Олий Мажлис Сенати раиси Танзила Норбоева 19 июнь куни ўтказилган бешинчи ялпи мажлис давомида ҳокимликларда ишлайдиган мутасаддиларнинг ҳуқуқий саводхонлиги қай даражада эканлиги масаласига тўхталиб ўтди.
Унинг билдиришича, ўтган йилда судларда ҳокимларнинг қарорлари билан боғлиқ 3 мингта иш кўриб чиқилган бўлса, 1 минг 255 таси, яъни 42 фоизи ноқонуний, деб топилганини қайд этди. Бунинг оқибатида оддий халқ азият чекмоқда.
Сенат раиси адлия вазирига ҳокимликда ишлайдиган мутахассислар ҳуқуқий маданиятини ошириш зарурлиги бўйича тавсия берди. Ҳокимлар томонидан йўл қўйилаётган ноқонуний хатти-ҳаракатлар назоратга олиниб, тегишли чоралар кўрилиши кераклигини таъкидлади.
«Адлия вазирлиги томонидан кўп ишлар қилинмоқда. Ҳуқуқий тарғиботнинг янги усулларидан ҳамда замонавий ахборот-коммуникация технологиялари имкониятларидан кенг фойдаланилмоқда. Лекин вазирлик ўз фаолиятида эътибор қаратиши керак бўлган жиҳатлар ҳам бор. Жамиятда ҳуқуқий маданиятни юксалтириш бўйича тадбирларни мониторинг қилиш ва баҳолаш тўғрисидаги низом бўйича ҳуқуқий тарғибот тадбирларини мониторинг қилиш зарур.
Карантин шароитида кўрдикки, қонунчилигимизда масофавий таълим, меҳнат муносабатлари, хизмат кўрсатиш ва бошқа масалалар назарда тутилмаган. Оқибатда давлат хизматчилари, тадбиркорлар, умуман, аҳоли учун кўплаб ноқулайликлар юзага келди. Шуларни инобатга олиб, вазирлик ва идораларнинг 30 яқин вакилларидан иборат таркибда ишчи гуруҳ, сенаторлар бошчилигида тегишли қонунчилик йўналишлари бўйича кичик гуруҳлар шакллантирилди.
Бу масала Сенат кенгаши мажлисида келгуси ҳафтада кўриб чиқилади. Фурсатдан фойдаланиб айтмоқчиманки, айнан Адлия вазирлиги ушбу жараёнга бош-қош бўлиб, биз билан узвий ҳамкорликда иш олиб бориши зарур», — деди Танзила Норбоева.
Изоҳ (0)