AQSh prezidenti Donald Tramp Xitoy prezidenti Si Szinpindan qayta saylanishida unga yordam berishini “o‘tinib so‘ragan”. Bu haqda Trampning milliy xavfsizlik bo‘yicha sobiq yordamchisi Jon Bolton o‘zining Oq uydagi faoliyati haqidagi kitobida ma’lum qilgan. Kitob hali chop etilmagan bo‘lib, undan parchalarni The Washington Post gazetasi e’lon qilgan.
Boltonning so‘zlariga ko‘ra, 2019-yilning iyunida Yaponiyaning Osaka shahrida bo‘lib o‘tgan sammitdagi ikki tomonlama uchrashuvda Si Szinpin Trampga AQShda Xitoyni tanqid qilishlaridan shikoyat qildi. “U (Si Szinpin) ismlarini oshkor qilmagan holda amerikalik ayrim siyosatchilar Xitoyga sovuq urush chiqarishga turtki berib, noto‘g‘ri xulosa qilayotganini aytdi”, — deydi Bolton.
Tramp esa, uning so‘zlariga ko‘ra, Si Szinpin demokratlarni nazarda tutyapti, deb taxmin qilgan. “Tramp demokratlar orasida Xitoyga nisbatan katta adovat borligini ta’kidladi”, — deb yozmoqda prezidentning sobiq maslahatchisi.
Shundan so‘ng “Tramp Xitoyning iqtisodiy salohiyatiga shama qilgan holda yaqinlashib kelayotgan AQSh prezidentligi saylovlariga gapni burib, Si Szinpindan uning g‘alabasini ta’minlashga yordam berishini o‘tinib so‘ragan. U fermerlarning va Xitoyning soya va bug‘doy sotib olish hajmining oshirishi saylov natijalariga ta’sirida muhim ahamiyat kasb etishini ta’kidlagan”, — deydi Bolton.
Jon Boltonning bildirishicha, u Trampning gaplaridan to‘liq iqtibos keltirishi mumkin, lekin unga bunday qilish taqiqlangan.
Amazon’ning bestsellerlar top-100 taligida Boltonning kitobi birinchi o‘rinda. Kompaniya uni hozirgacha faqat oldindan buyurtma qilish asosida sotmoqda. Kitob to‘liq ko‘rinishda 23-iyun kuni chop etilishi rejalashtirilmoqda.
Avvalroq AQSh Adliya vazirligi Oq uydagi faoliyati haqida kitob nashr etmoqchi bo‘lgan Trampning sobiq yordamchisi Jon Boltonni sudga bergani haqida xabar qilingandi.
Izoh (0)