Бугун,

  • USD 10940.05
  • RUB 182.26
  • EUR 11121.65

Ўзбекистонда сўнгги икки йил ичида тез тиббий ёрдам машиналарининг ўз вақтида етиб келмагани сабабли 48 мингдан ортиқ ўлим ҳолати юз берган. Охирги уч йилда ҳайдовчилар томонидан махсус автотранспорт воситаларига йўл бермаслик билан боғлиқ 700 дан зиёд ҳолат аниқланган. Бу ҳақда Сенат раиси Танзила Норбоева 19 июнь куни Сенатнинг бешинчи ялпи мажлисида маълум қилди.

Фото: «Дарё»

Фото: «Дарё»

«Аслида ҳар қандай ҳолатда ҳам уларга йўл бериш керак. Бироқ уларни ўтказиб юбораман, деб бошқа ҳайдовчиларимиз айбсиз айбдор бўлиб қолмоқда», — деди Сенат раиси.

Танзила Норбоеванинг таъкидлашича, ҳайдовчилар махсус автотранспорт воситаларини ўтказиб юбориб қоида бузса ҳам жарима тўлайди, қоидани бузмаслик учун уларга йўл бермаса ҳам жарима тўлайди.

Мажлисда Сенатнинг Суд-ҳуқуқ масалалари ва коррупцияга қарши курашиш қўмитаси раиси Ботир Матмуродов «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонунни тақдимот қилди. Мазкур қонун билан Маъмурий жавобгарлик тўғрисидаги кодексга қўшимчалар киритиш режалаштирилмоқда.

«Амалиётда кўп кузатилади: тез ёрдам, ўт ўчириш хизматлари ва бошқа хизматларнинг автомашиналарига йўл бериш, уларни тез ўтказиб юбориш жараёнида бирор қоида бузилса ва видеокамераларга тушиб қолса, ҳайдовчиларимиз айбсиз айбдор бўлиб қолмоқда. Катта жарималар тўланган ҳоллари ҳам мавжуд. Бу масалада бизга ҳам кўплаб мурожаатлар келган», — деди сенатор.

Маълум қилинишича, Маъмурий жавобгарлик тўғрисидаги кодексга киритилаётган қўшимчалар ана шундай ҳолатларни бартараф этишга қаратилган. Агар ҳайдовчилар тезкор ва махсус хизматларнинг транспорт воситаларига тўсиқсиз ўтиб кетиш учун йўл бергани сабабли йўл ҳаракати қоидалари бузилганлиги қайд этиладиган бўлса, улар бунинг учун жавобгарликка тортилмайди.

Бунда ҳайдовчининг ҳуқуқбузарлиги ўта зарур ҳолатларда содир этилган деб ҳисобланади ва маъмурий иш тугатилади.

Танзила Норбоеванинг таъкидлашича, мазкур қонунни қабул қилиш муаммони ҳал қилишнинг бир қисми саналади. Йўллардаги тартиб-интизомга фақатгина қоидабузарликни қайд этиб, жарима ундириш билан эришиб бўлмайди. «Бугун қонун чиқса, эртадан бошлаб ҳайдовчиларни жазога тортиш керак эмас. Аввало, тушунтириш, ўргатиш, огоҳлантириш керак», — деди Танзила Норбоева.

Эслатиб ўтамиз, Тошкент шаҳрида 2020 йилнинг январь ойида тез тиббий ёрдам хизмати чақириқларни автоматик қабул қилиш ва ижро этиш бўйича тўлиқ рақамлаштирилган ҳамда 150 та махсус Ford автомобили билан таъминланганди. Ушбу тизимни 2020—2021 йилларда республиканинг барча ҳудудларига босқичма-босқич татбиқ этиш режалаштирилмоқда. Шунингдек, нодавлат тиббиёт ташкилотлари томонидан ўз эҳтиёжлари учун республика ҳудудига олиб кириладиган янги тез тиббий ёрдам автомобиллари 2022 йил 1 январгача бўлган муддатга импорт божхона божидан озод қилинган.

Изоҳ
Асосий янгиликлар