Ўзбекистонда коронавирусга чалиниш ҳолатлари кундан кунга ортиб бориши ортидан шифохоналардаги беморлар сони биринчи марта 1500 нафардан ошиб кетди. Ҳозирда Ўзбекистоннинг 10 та ҳудудидаги шифохоналарда 1532 нафар бемор коронавирусдан даволанмоқда.

Фото: «Дарё»

Ўзбекистонда шу пайтгача бир вақтда шифохонада коронавирусдан даволанаётган беморлар сони 1500 дан ошмаганди. Апрель ойининг иккинчи ярмида шифохоналардаги беморлар сони 1300 нафардан кўп бўлганди. Шундан сўнг соғайганлар сони янги касалланганлар сонидан кўпайиши ортидан шифохонадаги беморлар сони камая бошлади. 28 апрель куни беморлар сони 1000 нафардан камайди, 18 майда эса 464 нафар бемор қолганди. Даволаниш кўрсаткичи 82 фоизга етиб, коронавирусдан холи ҳудудлар сони ҳам ошиб бораётганди.

Карантин чекловлари енгиллаштирилиб, хориждан чартер рейслар сони кўпайтирилгач, беморлар сони ҳам кўпайишни бошлади.

Ўзбекистонда 17 июнь соат 23:00 ҳолатига кўра, 5682 кишида коронавирус аниқланган бўлса, улардан 4131 нафари касалликдан фориғ бўлган. 19 бемор эса касаллик асоратларидан вафот этган.

Айни вақтда шифохоналардаги 1532 нафар бемордан 1203 нафари Тошкентдаги тиббиёт муассасаларида даволанмоқда (Сирдарё вилоятидаги беморлар ҳам Тошкент шаҳрига ўтказилган). Қолган 329 нафар бемор мамлакатнинг 9 ҳудудидаги шифохоналарда даволанмоқда.

Қорақалпоғистонда 6, Андижонда 7, Сурхондарёда 15, Наманганда 21, Самарқандда 23, Хоразмда 24, Бухорода 27, Навоийда 51 ва Қашқадарёда 155 нафар бемор қолди. Жиззах ва Фарғона вилоятлари эса коронавирусдан холи ҳудуд бўлиб турибди.

Охирги вақтларда Ўзбекистонда касаллик юқтириб олиш ҳолатлари кўпаймоқда. 7 июндан буён 9 марта бир кунда касалланганлар сони 100 нафардан ошди, шулардан 2 тасида эса 200 нафардан ҳам ошди. Касалликдан соғайиш ҳолатлари эса сўнгги кунларда анча паст кўрсаткични қайд этмоқда. Мисол учун, 15 июнь куни янги касалланганлар соғайганлардан деярли 2,5 баробар (183 га 76), 16 июнь куни 3 баробар (230 га 77), 17 июнда эса деярли 5,5 баробар (189 га 35) кўп бўлди.

Янги тартибга кўра, коронавирусдан даволаниб чиққан беморлар реабилитацияга эмас, тўғридан-тўғри уйига жўнатилмоқда. Реабилитацияга кузатилганлар орасида вируснинг қайталаниши билан боғлиқ ҳолатлар кузатилмагач, бу тажрибадан воз кечилди. Реабилитациядаги беморларнинг ҳар бири учун 2,8 миллион сўмдан пул сарфланаётганди. 23 май ҳолатига кўра, реабилитацияга ўтказилган 2492 нафар бемор учун 6 миллиард 977 миллион сўм сарфлангани маълум қилинганди.

Ўзбекистон беморларни даволашда яна бир янги амалиётга ўтиш арафасида. Президент Шавкат Мирзиёев 16 июндаги видеоселекторда «Вируснинг енгил шакллари аниқланган ёки касаллик аломатларсиз ўтаётган фуқароларни уй шароитида тиббий назоратда ушлаш ва даволаш амалиётини йўлга қўйишимиз керак», деб айтиб ўтди.

ССВ матбуот котиби Фурқат Санаев ҳатто дунёнинг ривожланган давлатларида ҳам коронавирусга чалинганлар фақат оғир ҳолатлардагина шифохонага ётқизилиши, қолган пайт керакли дори-дармонлар тавсия қилиниб, уйда даволаниш буюрилишини қайд этди.

Ўзбекистон бош давлат санитария инспектори Нурмат Отабеков 1 июндаги брифингда коронавирус инфекцияси 80 фоиз ҳолатда енгил, 15 фоиз ҳолатда ўрта оғирликда ва фақат 3-5 фоиз ҳолатда оғир, яъни нафас етишмовчилиги билан кечишини айтиб ўтганди.

Ҳозирги кунда шифохоналарда коронавирусдан даволанган ҳар бир бемор учун 32,3 миллион сўмдан пул сарфланмоқда. 23 майда эълон қилинган ҳисоботда коронавирусга чалинган беморлар даволаниб чиқиши учун 109 миллиард сўмдан ортиқ пул сарфлангани маълум бўлганди.