Ўзбекистон Марказий банки 2020 йилнинг май ойида ички валюта бозоридаги ҳолатни хўжалик юритувчи субъектлар валютага бўлган талабнинг мўътадиллиги ҳамда жисмоний шахсларнинг валюта операциялари бўйича талаб ва таклифининг нисбатан барқарорлашиши билан изоҳлади.
Марказий банк берган маълумотга кўра, май ойида ички валюта бозоридаги операцияларнинг умумий ҳажми 1,2 миллиард АҚШ долларини ташкил этиб, апрель ойига нисбатан 1,1 баробарга пасайган.
Ўтган ойда юридик шахслар томонидан чет эл валютасига бўлган талаб 2020 йилнинг ўтган ойлари даражасида сақланиб қолган ва 1 миллиард АҚШ долларидан зиёдроқ маблағни ташкил этган.
Жумладан, ҳисобот ойида биржадан ташқари валюта бозорида хўжалик субъектлари томонидан 258 миллион АҚШ доллари миқдорида чет эл валютаси сотиб олинган бўлса, валюта биржасидаги операциялар ҳажми 767 миллион АҚШ долларига тенг бўлган.
Валюта бозорида чет эл валютасини сотиб олиш мақсадлари таркибида асосий улуш (63 фоизи) ишлаб чиқариш учун асбоб-ускуналар, товарлар ва хом ашё импорти, 21 фоизи халқ истеъмоли товарлари ва дори-дармон маҳсулотлари импорти, 13 фоизи хорижий кредитларни сўндириш ва қолган 3 фоизи бошқа мақсадлар учун харид қилинган.
2020 йилнинг май ойида ички валюта бозорида чет эл валютасини харид қилган хўжалик юритувчи субъектлар сони 5823 тани ташкил этиб, апрель ойига (4971 та) нисбатан 852 тага кўпайган.
Жисмоний шахслар томонидан валюта айирбошлаш шохобчалари орқали сотилган чет эл валютаси миқдори 354 миллион АҚШ долларини ташкил этиб, апрель ойига нисбатан 2,1 баробарга ошган (2020 йилнинг апрель ойида 172 миллион АҚШ долларини ташкил қилганди). Мазкур даврда жисмоний шахслар томонидан 217 миллион АҚШ доллари сотиб олиниб, ушбу кўрсаткич апрель ойига (321 миллион доллар) нисбатан 32 фоизга пасайди.
Май ойи давомида халқаро пул ўтказмалари орқали республикага келиб тушган валюта маблағлари ҳажми 485 миллион АҚШ долларини ташкил этиб, апрель ойи кўрсаткичига нисбатан 1,9 баробарга ёки 235 миллион АҚШ долларига ошган.
Ички валюта бозорида хорижий валютадаги умумий таклиф ҳажми 892 миллион АҚШ долларини (Марказий банкнинг интервенцияларини ҳисобга олмаган ҳолда) ташкил этиб, апрель ойига нисбатан 1,1 баробар ошган.
Ушбу даврда Марказий банкнинг валюта интервенциялари олтин-валюта захираларининг нейтраллиги принципига асосланган ҳолда амалга оширилди. Бунда Марказий банк томонидан сотилган чет эл валютасининг соф ҳажми 2020 йилнинг январь май ойларида сотиб олинган монетар олтин ҳажми доирасида бўлиши таъминланди.
Январь май ойида импортни молиялаштириш манбалари таркибида ички валюта бозорида сотиб олинган маблағлар (конвертация) улуши 56 фоизни, хорижий валютадаги ўз маблағлари улуши 20 фоизни ташкил этган.
Ҳисобот даврида миллий валютанинг алмашув курси динамикаси валюта бозоридаги талаб ва таклифнинг жорий нисбатидан келиб чиқиб, ички ва ташқи омиллар таъсирида шаклланди. Хусусан, 2020 йил май ойи давомида миллий валюта курси 0,15 фоизга қадрсизланган (10 133 сўм/доллардан 10 148 сўм/долларгача).
Изоҳ (0)