Ўзбекистон Соғлиқни сақлаш вазирлигида 17 июнь, чоршанба куни Япония ҳукуматининг беғараз ёрдам дастури доирасида юқори технологияли тиббий асбоб-ускуналар етказиб бериш лойиҳаси бўйича ҳужжатлар тўпламини имзолаш маросими бўлиб ўтди. Бу ҳақда Соғлиқни сақлаш вазирлиги хабар берди.
Вазирлик томонидан маълум қилинишича, ҳужжатлар тўпламини соғлиқни сақлаш вазири Алишер Шодмонов ва Япониянинг Ўзбекистондаги элчиси Фужияма Ёшинори имзолади.
Грантнинг умумий миқдори 500 миллион иена (тахминан, 4,5 миллион доллар)ни ташкил қилади. Ушбу маблағга ултратовуш аппарати, рақамли рентген аппарати, компьютер томографи, маммограф каби замонавий технологиялардан иборат инновацион кўчма диагностика станцияси (контейнер) етказиб берилади. Шунингдек, ПЦР лабораторияси, ультратовуш аппарати, рақамли рентген аппарати, маммографдан иборат юзлаб касалликларга қисқа фурсат ичида аниқ ташхис қўйиш имкониятига эга бўлган кўчма лаборатория (контейнер), юқумли касалликлар шифохоналари учун учта компьютер томографи етказиб берилади.
Қайд этилишича, лойиҳанинг мақсади COVID-19 пандемияси даврида Ўзбекистон соғлиқни сақлаш тизими моддий техник базасини янада мустаҳкамлашдан иборат. Таъкидланишича, кўплаб юқори технологияли ускуналарни ўзида жам қилган ушбу мобил поликлиникаларни мамлакатнинг исталган ҳудудига етказиш мумкин бўлади. «Айниқса, юқумли касалликлар ўчоғи пайдо бўлган тақдирда замонавий диагностика ва лаборатория жиҳозларининг тўлиқ тўпламидан иборат контейнер маҳаллий аҳолига тез ва сифатли тиббий ёрдам кўрсатиш имконини беради», — дейилади вазирлик хабарида.
Мавзуга доир:Япония коронавирус оқибатларини бартараф этиш учун Ўзбекистонга 1,9 млн доллар ажратади
Изоҳ (0)