Ўзбекистон Президенти Шавкат Мирзиёев 16 июнь куни бўлиб ўтган видеоселектор йиғилишида жорий йилда белгиланган меъёрдан кам ғалла олган фермер ва кластерлардан ер қайтариб олиниши ҳақида гапирди. Бу ҳақда «Kun.uz» хабар берди.
«Бу йил қилинган барча чора-тадбирлар, ўз вақтида етказиб берилган ўғит, агротехник тадбирлар, қолаверса, об-ҳавонинг қулай келгани сабабли ғаллачиликда мўл ҳосил кутиляпти. Энди иложи борича ғалламизни тез йиғиштириб олиб, бир кун олдин бўлса ҳам экспорт маҳсулотларини эксак, ҳозирги иқтисодиётимизга мадад бўлади. Масалан, Ёзёвон туманидаги «Баҳромбек» фермер хўжалиги 95 центнер ҳосил оляпти», — деган давлат раҳбари.
Шунингдек, Термиз, Пахтакор, Сайхунобод туманларидаги бир қатор фермер хўжаликлар ҳам 80-90 центнердан ҳосил олишни режалаштираётгани қайд этиб ўтилди.
Давлат раҳбари бу ҳосилдорлик нафақат озиқ-овқат хавфсизлигини таъминлашга хизмат қилишини, балки фермерни ҳам бой қилишини таъкидлаган.
«Шу ўринда яна бир гапни айтмоқчиман. Мана, Барноев ўтирибди селекторда. Агар қайси вилоятда 20 центнердан кам ҳосил олинса, менга маълумотнома ёзиб, ерни оласиз. Мана шундай шароитда мўл ҳосил олмаган фермер ернинг эгаси эмас», — дея таъкидлаган Президент.
Эслатиб ўтамиз, Президент раҳбарлигида 16 июнь куни бўлиб ўтган видеоселекторда коронавирус билан боғлиқ вазият, хизмат кўрсатиш соҳасини ривожлантириш, ёшларни иш билан таъминлаш, ички туризмни ривожлантириш, ғалла ўрим-йиғим мавсуми масалалари муҳокама қилинди.
Изоҳ (0)