Жанубий Корея КХДРнинг «номаъқул» хатти-ҳаракатларига ортиқ тоқат қилмаслигини билдирди

Сеул бундан буён КХДРнинг «номаъқул хатти-ҳаракатлари ва сўзларига» тоқат қилмайди. Бу ҳақда Жанубий Корея президенти администрацияси вакили Юн До Хан брифингда маълум қилди, деб хабар бермоқда Yonhap агентлиги.

Шундай қилиб республика расмийлари КХДР етакчисининг синглиси Ким Ё Чжоннинг президент Мун Чжэ Иннинг ярим оролдаги можарони дипломатик ва тинч йўл билан ҳал этиш тўғрисидаги таклифига берган кескин жавобларига муносабат билдирди.

Корея Марказий телеграф агентлигининг маълум қилишича, Жанубий Корея 15 июнь куни КХДРдан Пхенянга махсус вакилни юборишга рухсат сўраган, бироқ улардан рад жавобини олган.

Агентликнинг хабар беришича, «Жануб Шимолий Кореянинг кучли контрҳужумидан ваҳимага тушиб қолди, шу сабабли президент Мун Чжэ Ин Пхенянга махсус вакилларни юбормоқчи эди.

Бунга жавобан, Корея Меҳнат партияси марказий қўмитаси тарғибот ва ташвиқот бўлими бошлиғи ўринбосари Ким Ё Чжон Сеулнинг талабини ‘ҳийла’ деб атади ва бундай таклифга рози бўлишдан ‘қатъиян бош тортди’ ».

Жанубий Корея КХДРни президент Мун Чжэ Иннинг мурожаати мақсадини тушунмаганликка йўйиб, Ким Чен Ин синглисининг сўзларини асоссиз деб атади.

«Биз энди Шимолий Кореянинг аҳмоқона нутқи ва хатти-ҳаракатларига тоқат қилмаймиз», — деган Юн До Хан. Унинг айтишича, Пхеняннинг хатти-ҳаракатлари ҳар икки мамлакат раҳбарлари ўртасидаги ўзаро ишончга жиддий путур етказади.

Эслатиб ўтамиз, Шимолий ва Жанубий Корея муносабатлари сўнгги икки ҳафта давомида ёмонлашиб бормоқда. Дастлаб КХДР Жанубий Кореянинг қўнғироқларига жавоб бермади. 9 июнь куни эса КХДР 2018 йилдан бери илк бор Жанубий Корея билан алоқаларни тўхтатди. КХДР Сеул билан барча алоқа линияларини Пхенянга қарши юборилган ташвиқот варақалари сабаб блоклаган. Узоқ йиллар давомида ишламаган алоқа линиялари 2018 йилда қайта тикланган, шундан буён мамлакатлар кунига икки маротаба ўзаро қўнғироқлашиб турганди.

14 июнь куни Жанубий Корея ҳукумати Шимолий Корея билан боғлиқ ҳар қандай вазият юзасидан жавоб беришга тайёрлигини таъкидлаб, КХДРни икки мамлакат ўртасидаги ҳарбий битим бўйича келишувларини амалга оширишга чақирди. 16 июнь куни эса Шимолий Корея ҳарбийлари Кесон шаҳрида жойлашган Кореялараро алоқа офисини портлатиб юборди.

Эндиликда КХДР Жанубий Корея билан чегарадош қуролсизлантирилган ҳудудларга ўз қўшинларини қайтармоқчи. Шу мақсадда ўз қўшинларини Кимгансан туристик зонаси ва Кесон саноат комплексига жойлаштиришга тайёрланмоқда.