Месси фаолиятидаги 699-голини урди. Фаолиятини давом эттираётган футболчилар орасида ундан кўпроқ гол урган фақат бир футболчи бор

«Барселона» ҳужумчиси Лионель Месси Испания чемпионатининг 29-туридан ўрин олган «Леганес»га қарши баҳсда (2:0) ўз ҳисобига гол ёздириб қўйди.

Аргентиналик футболчи учрашувнинг иккинчи бўлимида пенальтини аниқ амалга ошириб, жамоасининг ғалабасини таъминлади. Бу Месси учун фаолиятидаги 699-гол бўлди (шулардан 629 таси «Барселона» сафида, 70 таси эса Аргентина терма жамоаси таркибида).

Бундан ташқари, Месси Ла Лигадаги 56-пенальтисини аниқ амалга оширди ва ушбу кўрсаткич бўйича иккинчи ўринга чиқиб олди, биринчи поғонани 61 аниқ пенальти билан Криштиану Роналду эгаллаб турибди.

Месси жорий мавсумда Испания чемпионатининг 24 учрашувида майдонга тушиб, 21 та гол урган ва 14 та голга ҳаммуаллифлик қилган.

Қайд этиш жоиз, фаолиятини ҳамон давом эттираётган футболчилар орасида Месси голлар сони бўйича фақат Криштиану Роналдудан ортда қолмоқда. Роналду ҳозиргача 725 та гол уришга муваффақ бўлган.