Коронавирус хавфи сабаб «қизил» ҳудудга айланган Китоб тумани аҳолисининг Шаҳрисабз шаҳрига бемалол кириб-чиқиши аҳоли эътирозига сабаб бўлмоқда. Бу ҳақда «Дарё»га маълум қилган фуқаро Феруза Очилованинг айтишича, китобликлар Шаҳрисабз шаҳри бозори ва шифохоналарига келиб-кетишда давом этмоқда.
«Кириб-чиқишни тақиқлаш имкони йўқми?, — дейди Феруза Очилова. — Китобликлар шаҳар бозори ва шифохоналарига келиб-кетишда давом этмоқда. Бу ҳолатда касаллик Шаҳрисабз шаҳрига ҳам тарқалиб кетмайдими?».
Китоб туман ҳокимлигининг маълумот беришича, тумандаги 5 нафар фуқарода коронавирус аниқланган ва шу сабаб карантин тартиби кучайтирилган. Туманда шахсий автотранспорт воситаларида ҳаракатланишга эрталабки соат 7:00 дан 10:00 га қадар, кечки соат 17:00 дан 20:00 га қадар рухсат этилган. Йўналишсиз такси ва жамоат транспортлари ҳаракати чекланган.
Ўзбекистонда 16 июнь куни 230 кишида коронавирус аниқланди. Ушбу ҳолатларнинг 104 таси Қашқадарёда қайд этилди.
Эслатиб ўтамиз, Қашқадарё вилояти «яшил» ҳудудга киритилса-да, Китоб ва Чироқчи туманлари «қизил» ҳудуд мақомида, Муборак тумани эса «сариқ» ҳудуд этиб белгиланган.
Изоҳ (0)