Koronavirus xavfi sabab “qizil” hududga aylangan Kitob tumani aholisining Shahrisabzga kirib-chiqishi aholi e’tiroziga sabab bo‘lmoqda

Koronavirus xavfi sabab “qizil” hududga aylangan Kitob tumani aholisining Shahrisabz shahriga bemalol kirib-chiqishi aholi e’tiroziga sabab bo‘lmoqda. Bu haqda “Daryo”ga ma’lum qilgan fuqaro Feruza Ochilovaning aytishicha, kitobliklar Shahrisabz shahri bozori va shifoxonalariga kelib-ketishda davom etmoqda.

“Kirib-chiqishni taqiqlash imkoni yo‘qmi?, — deydi Feruza Ochilova. — Kitobliklar shahar bozori va shifoxonalariga kelib-ketishda davom etmoqda. Bu holatda kasallik Shahrisabz shahriga ham tarqalib ketmaydimi?”.

Kitob tuman hokimligining ma’lumot berishicha, tumandagi 5 nafar fuqaroda koronavirus aniqlangan va shu sabab karantin tartibi kuchaytirilgan. Tumanda shaxsiy avtotransport vositalarida harakatlanishga ertalabki soat 7:00 dan 10:00 ga qadar, kechki soat 17:00 dan 20:00 ga qadar ruxsat etilgan. Yo‘nalishsiz taksi va jamoat transportlari harakati cheklangan.

O‘zbekistonda 16-iyun kuni 230 kishida koronavirus aniqlandi. Ushbu holatlarning 104 tasi Qashqadaryoda qayd etildi.

Eslatib o‘tamiz, Qashqadaryo viloyati “yashil” hududga kiritilsa-da, Kitob va Chiroqchi tumanlari “qizil” hudud maqomida, Muborak tumani esa “sariq” hudud etib belgilangan.