«Милан» ҳужумчиси Златан Ибрагимович Швецияда тиббий регламентни бузди, дея хабар қилмоқда Sportbladet.
Ибрагимович Швеция чемпионати доирасида кечган «Ҳаммарбю» ва «Эстерсунд» жамоалари ўртасидаги баҳсдан (2:0) сўнг мезбонлар кийиниш хонасига кирган. Тиббий регламентга кўра, кийиниш хонасига фақат жамоа ўйинчилари ва мураббийлар штаби аъзолари кириши мумкин.
Маълумот учун, Ибрагимович «Ҳаммарбю» клубининг йирик аксионерларидан бири ҳисобланади. Аввалроқ Ибра келаси мавсумдан ушбу клубда тўп суриши мумкинлиги ҳақида хабарлар янграганди.
Ҳозирда футболчи Швецияда жароҳатидан тикланмоқда. Январь ойида «Милан»га қайтган Златан А Серия жорий мавсумида 8 ўйин ўтказиб, учта гол ва битта голли узатма муаллифига айланди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)