Uzoq yillik ko‘rsatkichlarning poyoni, 5 ta penalti va 733 kunlik golsiz seriya. Superliga 4-turi raqamlarda

Futbol bo‘yicha O‘zbekiston chempionatining 4-tur bahslari 13—15-iyun kunlari bo‘lib o‘tdi.

“Championat.asia” nashri mavsum restartidan keyingi dastlabki turga oid bir qator statistikani taqdim etdi.

Superliga 4-turi raqamlarda

0 — Koronavirus pandemiyasi tufayli Superliga o‘yinlari muxlislarsiz davom ettirilmoqda. 4-tur bahslarining hech biriga muxlislar kiritilmadi. Ma’lum muddat o‘yinlar tomoshabinlarsiz o‘tadi.

1 — “Qo‘qon-1912” himoyachisi Bobirjon Akbarov 2020 yilgi chempionatda birinchi avtogol muallifi sifatida tarixda qoldi. Dastlabki 3ta turda hech bir futbolchi o‘z darvozasini ishg‘ol qilmagan edi.

2:2 — Superliganing 4-turidan o‘rin olgan 3ta uchrashuvda 2:2 hisobi qayd etildi. Qizig‘i yana uchta uchrashuvda 1:0 hisobi kuzatildi.

3 — “Metallurg” yarim himoyachisi Doniyor Narzullayev “Lokomotiv” bilan uchrashuvda (3:0) uchta golli uzatma berishga muvaffaq bo‘ldi.

5 — Superliganing 4-turida hakamlar darvozalarga jami 5 marta penalti belgiladi. Shundan ikkitasi golga aylandi xolos. “Nasaf” — “Navbahor” uchrashuvida ikkala jamoa a’zolari Umar Eshmurodov va Azizbek Turg‘unboyev, “So‘g‘diyona”da Shohruz Norxonov 11 metrli jarima to‘pidan gol ura olmadi. “Andijon” vakili Jamshid Hasanov esa “Buxoro” bilan o‘yinning o‘zida ikki bor penalti tepdi va ikkalasida ham gol urdi.

5 — OKMK O‘zbekiston chempionati tarixida bir o‘yinda 5 nafar o‘yinchini almashtirgan dastlabki klubga aylandi. Undan oldin boshlangan “Bunyodkor” — “Qo‘qon-1912” uchrashuvida murabbiylar uchtadan o‘zgarishni amalga oshirishdi.

10 — Qarshining “Nasaf” klubi 4 ta turdan so‘ng 10 ochko bilan musobaqa jadvalida peshqadamlikni qo‘lga oldi.

11 — OKMK klubi “Qizilqum” maydonida so‘nggi bor 2000-yilda g‘alaba qozongan edi. Oradan 11 yil o‘tib olmaliqliklar ushbu jamoani safarda mag‘lub eta oldi.

18 — Superliganing 4-turidan o‘rin olgan 7 ta uchrashuvda jamoalar jami 18ta gol urdi. Taqqoslash uchun 1-turda 22 ta, 2-turda 15 ta va 3-turda ham 18 ta gol urilgan edi.

33 — “So‘g‘diyona” O‘zbekiston chempionati doirasida so‘nggi bor “Paxtakor”ni 1999-yilgi mavsum mag‘lub etgan edi. Shundan keyin bo‘lib o‘tgan o‘zaro 33 ta uchrashuvda jizzaxliklar g‘alaba qozona olmagandi. Baqoyev shogirdlari 21 yildan so‘ng ilk bor “sherlar”ni mag‘lub etdi.

35 — “Lokomotiv” klubi o‘z maydonida so‘nggi bor 2017-yilgi mavsumda mag‘lub bo‘lgan edi. 2018 va 2019-yilgi chempionatlarda “temiryo‘lchilar” o‘z stadionida hech kimga yutqazmagandi. “Metallurg” “Lokomotiv”ning o‘z maydonidagi 35 o‘yinlik mag‘lubiyatsiz seriyasiga chek qo‘ydi.

42 — “Metallurg” futbolchisi Abror Toshqo‘ziyev “Lokomotiv” bilan o‘yinda zaxiradan maydonga tushganidan 42 soniya o‘tgach gol urishga erishdi. E’tiborlisi Andrey Shipilov maydonga tushirgan yana bir futbolchi Shahzod Ubaydullayev ham “temiryo‘lchilar” darvozasiga to‘p kiritdi.

93:56 — “Buxoro” — “Andijon” uchrashuvida mezbonlar vakili Behruz Sa’diloyev gol urganida tabloda mana shu daqiqalarni ko‘rsatib turgandi. Ushbu gol “Buxoro”ga 2020-yilgi mavsumdagi daslabki ochkoni keltirdi va 4-turdagi eng kech urilgan golga aylandi.

247 — “Navbahor” darvozaboni O‘tkir Yusupov joriy yilgi mavsumda hozircha eng uzun “quruq seriya” qayd etgan darvozabonga aylandi. Yusupov 1-turda “Paxtakor” bilan bahsning 88-daqiqasida gol o‘tkazib yuborganidan so‘ng “Lokomotiv” va “Andijon” bilan o‘yinlarda o‘z darvozasi dahlsizligini saqlab qoldi. 4-turda “Nasaf”ga qarshi uchrashuvning 66-daqiqasida gol o‘tkazib yuborgan posbonning “quruq seriya”si 247 daqiqaga yetdi.

290 — “Buxoro”ning bu mavsumdagi “quruq seriya”si aynan 290 daqiqaga teng bo‘ldi. Daslabki uchta turda umuman gol ura olmagan (270 daqiqa) buxoroliklar “Mash’al” bilan bahsning 21-daqiqasida mavsumdagi ilk golini urishdi. Shunday qilib 2020 yilgi O‘zbekiston chempionatida gol ura olmagan klub qolmadi.

733 — “Navbahor” hujumchisi Zabihillo O‘rinboyev O‘zbekiston chempionatida so‘nggi bor 2018-yil 12-iyun kuni “Metallurg” safida “Nasaf”ga gol urgan edi. Shundan -keyin 733 kun o‘tgach (2 yil-u 2 kun) O‘rinboyev yana "Nasaf" darvozasiga to‘p kiritishga erishdi.