АҚШнинг Озиқ-овқат маҳсулотлари ва дори воситалари сифати бўйича санитария назорати бошқармаси (FDA) касалхонага ётқизилган беморларни коронавирусдан даволашда безгакка қарши гидроксихлорохин ва хлорохин препаратларидан фойдаланишга берган рухсатини бекор қилди. Бу ҳақда бошқарманинг 15 июнь куни эълон қилган ҳужжатида маълум қилган.
Унда қайд этилишича, янги клиник тадқиқотлар эндиликда ушбу дориларни коронавирусга қарши самарали деб топишга ҳеч қандай сабаб йўқлигини кўрсатган.
«Биз илм-фанга таянишимиз, COVID-19 ҳақида янада кўпроқ маълумот олганимиз сари бу борадаги қарорларимиз ўзгариши мумкинлигини таъкидлагандик», — дейди FDA’нинг тиббий ва илмий масалалар бўйича ўринбосари Ананд Шаҳ.
Гидроксихлорин безгак ва ревматологик касалликларга қарши препаратдир. 28 март куни FDA ундан касалхонага ётқизилган беморларни коронавирусдан даволашда фойдаланишга рухсат берганди. FDA шифокор назоратисиз қўллашни тавсия этмаган.
24 апрель куни айрим беморлар юрагида муаммолар кузатилган ва 20 нафар кўнгилли ушбу ҳолат оқибатида вафот этгани сабабли АҚШда безгакка қарши хлорохин препаратини коронавирусга чалинган беморларни даволашда қўллаш бўйича синовлар тўхтатилганди.
АҚШ президенти Дональд Трампнинг коронавирусни даволашда безгакка қарши препаратларнинг самарали эканлиги тўғрисидаги сўзларидан сўнг безгакка қарши гидроксихлорохин ва хлорин препаратларига талаб 46 баравар ошган.
Президент препаратларнинг коронавирусни даволашда таъсирини бир неча бор ижобий баҳолаган. Мутахассислар эса COVID-19’ни даволашда расман тасдиқланмаган ушбу препаратлар ҳақида бундай хулосага келишга ҳали эрта эканлигини айтиб, унинг кўплаб салбий таъсирлари борлигидан огоҳлантирган.
22 майдан Жаҳон соғлиқни сақлаш ташкилотининг экспертлар гуруҳи гидроксихлорохин ва хлорохинни COVID-19 касаллигини даволашда қўллашни вақтинча тўхтатди, бунга ушбу дорилар туфайли ўлим ҳолатининг ошгани сабаб бўлган.
Изоҳ (0)