«Бухоро» катта мураббийи: «Андижон»га қарши баҳсда дарвозамизга йўқ жойдан икки марта пенальти белгиланди

Футбол бўйича Ўзбекистон Суперлигасининг 4-туридан ўрин олган «Бухоро» — «Андижон» ўйинидан (2:2) сўнг иккала жамоа мураббийлар ўз фикрлари билан ўртоқлашди.

Дастлаб «Андижон» клуби мураббийи Диёр Мирзабоев (аслида клуб бош мураббийи Виктор Кумиков, хабарларга кўра, унинг ҳужжат ишлари билан боғлиқ муаммолари бор ва шу сабабдан бу баҳсда жамоани Мирзабоев бошқариб турган) ўйин ҳақида қуйидаги фикрларни билдирди:

«21 кун жисмоний тайёргарликни маромига келтириш учун етарли бўлмади. Шу сабабдан захирадаги футболчиларимиздан фойдаландик. Иккита пенальтидан гол урган бўлсак-да якунда ғалабани қўлдан чиқардик. Вазиятлардан унумли фойдаланганимизда ғалаба билан қайтардик. Сўнгги дақиқаларда диққатни йўқолиши ҳисобни тенглашишига олиб келди. Иккала жамоага миннатдорчилик билдираман. Юқори даражада баҳсни ўтказиб беришди.

Томошабинларсиз ўйин? Фаолиятимда бундай ҳолатга илк бор дуч келишим. Ўртоқлик учрашувларида майдонга тушганимизда ҳам мухлисларимиз стадиондан туриб қўллаб-қувватлаб турарди.

Бешта футболчи алмаштиришга муносабатим қандай? Юқорида ҳам айтиб ўтдим, 20 кун жисмоний томондан тикланишга етмайди. Захирадан майдонга тушган футболчиларни айбдор қилмоқчи эмасман. Ютуқ ва мағлубият бари жамоаники. Лекин захирадан қўшилган ўйинчилар ўзини оқламади.Улардан ўйинни кучайтиришларини кутгандик. Бизда «Бухоро»га қараганда вазиятлар кўпроқ бўлди», – деб Мирзабоевнинг сўзларини келтиради «Championat.asia».

«Бухоро» катта мураббийи Мирислом Ҳасанов эса жамоаси дарвозаси томон белгиланган икки пенальтини ноҳақ деб деб атади.

«Уч ойдан сўнг футбол ўйнадик. Бу катта таъсир қилди. Легионерларимиз пандемия сабаб етиб кела олишмади. Шунинг учун ёшларни майдонга туширдик. Болларга ҳам раҳмат айтмоқчиман. Бугун ютишимиз ҳам, ютқазишимиз ҳам мумкин эди. Дарвозамизга икки маротаба йўқ жойдан пенальти белгиланди.

«Машъал» жамоаси барчасини профессионал тарзда шароитларни яратиб берди. Дезинфекция ишлари ва бошқа ташкилий ишларни аъло даражада қилиб берди. Биринчи бўлимда ҳаво ҳарорати жуда иссиқ эди. Дастлабки 25 дақиқадан сўнг футболчилар мослашиб олишди.

Биринчи бўлимда ёмон ўйнамадик. Иккинчи бўлимда толиқиб қолдик. Бизга ғалаба керак эди. Бир томондан боллар ҳали тайёр эмасди. Ҳаттоки, ўртоқлик учрашувлари ҳам ўтказмадик. 8-9 кун давомида тайёргарлик кўрдик», – дейди Мирислом Ҳасанов.

Ушбу ўйинда «Бухоро» мавсумдаги биринчи очкосини қўлга киритган бўлса, «Андижон» эса навбатдаги дурангни қайд этди. Ҳар иккала жамоа ҳам мусобақа жадвалининг сўнгги қаторларидан ўрин («Анджион» — 12-ўрин, «Бухоро» эса 13-ўрин) эгаллаб турибди.

Мавзуга доир: