Дилявер Ваниев «Сурхон»га қарши ўйин ҳақида: «Натижадан қониқмадим»

Футбол бўйича Ўзбекистон Суперлигасининг 4-туридан ўрин олган «Сурхон» ва «Машъал» жамоалари ўртасидаги ўйиндан сўнг иккала жамоа мураббийлари учрашув ҳақидаги фикрларини билдириб ўтди.

«Узоқ танаффусдан сўнг жамоаларнинг ўйин темпига киришиб кетиши қийин бўлмоқда. Иккита тўп ўтказиб юборганимиз жуда ҳам аламли бўлди, лекин йигитлар ўзларида куч топди, шу боисдан бир очкони қўлга киритдик. Бугунги учрашувни таҳлил қилиб, хулоса чиқарамиз.

«Машъал» тартибли жамоа саналади. Афсуски, қарши ҳужумларда кўп гол ўтказиб юборяпмиз. Ушбу хатоларни таҳлил қилиб, уларни бартараф этамиз.

Футболчилар 3 ой давомида индивидуал машғулотлар олиб борди. Барибир профессионал футболчи якка тартибда шуғуллангани билан жамоавий машғулот ўтказмаган. 12 кун жамоавий машғулотлар олиб бордик, холос. Шу боис футболчиларнинг спорт формасида эмаслиги табиий ҳол», — деди сўнг мезбонлар устози Баҳром Ҳайдаров.

«Машъал» катта мураббийи Дилявер Ваниев эса воҳа дербиси ҳақида қуйидаги фикрларни билдирди:

«Ўйин жиҳатдан рақибдан устун бўлдик, аммо натижадан умуман қониқмадим. Ўйлашимча, ўйин жиҳатидан рақибдан устунлик қилдик, учрашув сўнггида эса мезбонлар босимни оширишди. Стандарт вазиятлардан фойдалана олмадик. Легионерлар? Умуман олганда, уларнинг ўйинларидан қониқдим».

Мазкур натижадан кейин «Машъал» очколарини 5 тага етказиб, 7-ўриндаги «Навбаҳор»га етиб олган бўлса, «Сурхон» 11-поғонадаги ўрнини сақлаб қолди.