Футбол бўйича Ўзбекистон Суперлигаси 4-туридан ўрин олган сўнгги учрашувда Тошкентнинг «Локомотив» клуби Бекободнинг «Металлург»ини қабул қилди. Учрашувда бекободликлар «темир йўлчилар» дарвозасига жавобсиз учта тўп киритди.
Ўйиндан сўнг «Локомотив» устози Андрей Фёдоров мағлубиятга сабаб дея, вазиятлардан унумли фойдалана олмасликни кўрсатди.
«Ўйиндан сўнг таҳлил қилиш қийин. «Металлург»га қарши сўнгги йилларда қийин учрашувлар ўтказаётган эдик. Одатда, уй ёки сафар баҳсидан қатъи назар ким биринчи гол урса, ўша ғалаба қозониб келаётган эди. Ҳисоб 0:0 бўлиб турган вақтда юзага келган вазиятлардан унумли фойдаланишимиз керак эди. Шунда баҳс бутунлай бошқача сценарий остида ўтар эди. Тўғри, ўйинни кучайтириш учун захирадан тушган футболчилар ҳужумдаги агрессивликни оширди, аммо уларга маҳорат етишмади. Бундай учрашувлардан улар тажриба олишади», — дейди Фёдоров.
Меҳмонлар устози Андрей Шипилов ўйин ҳақида билдирар экан, бироз камтарлик қилган ҳолда ғалабани омадга йўйди.
«Узоқ вақт ўйин амалиёти бўлмади ва бироз ноқулайликлар бўлди. Биз қандай ўйнашимиз, рақиб қандай ўйнашини олдиндан айтиш мушкул эди. Шуни айта оламанки, бугун омадимиз келди. Йигитларга кийим алмаштириш хонасида «Локомотив»ни сафарда илк бор мағлуб этганимизни айтиб ўтдим. Биз ўз ишимизни бажардик. Биринчи бўлимда ҳар икки жамоа ҳам яхши ҳаракат қилди. «Темир йўлчилар» тўпни кўпроқ назорат қилди.
35-дақиқалардан кейин эса ортга бироз «ётишга» мажбур бўлдик. Шунчаки, жамоа ҳали етарлича куч тўплай олмагани кўринди. Иккинчи бўлимда эса... Келинг, икки ўзгаришнинг ортидан икки гол бўлгани сабабли ўзимни даҳога тенглаштирмайман.
Бу режа доирасидаги ўзгариш эди. Футболчиларимнинг катта қисми 90 дақиқалик футболга тайёр эмаслиги кўриниб турганди. Шунчаки чарчаган футболчиларни ўзгартиргандим, кейин эса омад кулиб боқди. Шундай ажойиб стадионда ўйнаш жуда ёқимли. Ҳаво ҳам унчалик иссиқ бўлмади. Фақатгина узоқ муддат давомида футболдан дам олганимиз бизга халақит қилаётганди. Аммо барибир соғлиқ биринчи ўринда, спортни эса кейинги поғонага қўяман», — дея Шипиловнинг сўзларини келтирмоқда «Championat.asia» нашри.
Ушбу ғалабадан сўнг «Металлург» очколарини 7 тага етказиб олган ҳолда 5-ўринга кўтарилди. «Локомотив» эса (6 очко) 7-поғонага тушиб кетди.
Мавзуга доир: Дилявер Ваниев «Сурхон»га қарши ўйин ҳақида: «Натижадан қониқмадим»
Изоҳ (0)