Америка киноакадемияси «Оскар» мукофотининг асосий йўналишига номзодлар сонини чеклаб қўйди. Мукофотнинг 94-маросимидан бошлаб уларнинг сони 10 тани ташкил этади, деб хабар беради киноакадемия матбуот хизмати.
«2021 йилда ўтказиладиган 94-маросимдан бошлаб ‘Энг яхши фильм’ йўналиши бўйича йилдан йилга ўзгариб турадиган номзодлар сони ўрнига ўнта номзод тақдим этилади», — дейилади хабарда.
Бунга қадар ушбу йўналиш бўйича мукофотга номзодлар сони бештадан ўнтагача ўзгариб турган. Масалан, 2019 йилда «Энг яхши фильм» йўналиши бўйича 8 та номзод курашган бўлса, 2018 ва 2020 йилларда уларнинг сони 9 тани ташкил этган.
Шунингдек, эндиликда академия Academy Screening Room махсус платформаси орқали «Оскар»га номзодларни бутун йил давомида кузатиб боришлари мумкин. Мукофот ташкилотчиларининг фикрича, бу овоз берувчиларнинг барча номзодлар билан яхшилаб танишиб олиши учун имконият яратади.
Аввалроқ «Оскар» мукофоти ташкилотчилари коронавирус пандемияси сабаб фильмларни танлаб олиш қоидасига ўзгартириш киритиш бўйича қарор қабул қилган, номзодларни танлаб олиш жараёнида вақтинча фақат онлайн равишда намойиш этилган картиналар иштирок этиши ҳақида хабар берилганди.
Изоҳ (0)