Риз Уизерспун ўқитувчиларга кўйлак совға қилди. Бундан норози айрим педагоглар актрисани судга берди

Америкалик актриса Риз Уизерспун коронавирус пандемияси даврида ўқитувчиларни қўллаб-қувватламоқчи бўлгани учун ноқулай вазиятга тушиб қолди, деб ёзади Daily Mail.

Уч нафар педагог ваъда қилинган совғани ололмагани учун актрисани судга берган.

Икки ой олдин 44 ёшли Уизерспун пандемия даврида ҳам ишлашда давом этаётган ўқитувчиларга ўз бренди Draper James’га оид кўйлакларни совға қилишга қарор қилганди.

Брендга оид кўйлакни олиш учун ўқитувчилар махсус анкетани тўлдириши керак эди.

Акция 7 апрель куни ўтказилди, 250 киши кўйлакни олди. Бошқа иштирокчиларга бренд томонидан ишлаб чиқарилган исталган маҳсулотга 25 фоизлик чегирма тақдим этилди.

Акция натижалари уч нафар ўқитувчига маъқул келмаган. Улар актриса ва унинг брендини судга берган. Педагогларнинг айтишича, дастлаб танлов шартларида бунинг кийим тарқатиш акцияси эмас, балки ютуқли ўйин эканлиги айтилмаган.

Хафа бўлган аёлларнинг айтишича, актриса ТВ орқали ўзи ва брендини реклама қилиб олган, ваъда қилинган кийимларни эса бермаган.

«Биз жуда тез бу акцияни ташкиллаштирдик, шунча кўп инсон унда иштирок этиш истагини билдиради, деб ўйламагандик. Компаниямиз ҳеч қачон бунчалик кўп мижоз билан ишламаган», — дейди актрисанинг Draper James бренди вакиллари.

Улар судга мурожаат қилган аёллар билан боғланиб, бу кийим тарқатиш акцияси эмаслигини тушунтириб, маҳсулотларига 30 фоизлик чегирмани таклиф этган.

Ўқитувчилар эса бундан баттар дарғазаб бўлган.