Zara, Bershka, Pull & Bear ва Massimo Dutti брендларига эгалик қилувчи Испаниянинг Inditex компанияси 1000-1200 та дўконини ёпади. Бу ҳақда компания ҳисоботида айтиб ўтилган.
Маълум қилинишича, гап яхши жойларда жойлашмаган кичик дўконлар ҳақида кетмоқда. Уларнинг кўпчилиги Zara дўконлари ҳисобланади. Шу билан бирга, Inditex 450 та янги дўкон очади.
Бу режалар 2020—2022 йилларда амалга оширилади. Натижада Inditex ўз савдо тармоғини ҳозирги 7412 та дўкондан 6700-6900 та дўконга камайтиради.
Маълум қилинишича, Inditex онлайн савдони ривожлантиришни кўзламоқда. 2019 йилнинг кузида унинг улуши компания даромадларининг 19 фоизини ташкил қилган. 2022 йилга бориб онлайн савдо улушини 25 фоизга етказиш режалаштирилмоқда.
Inditex карантин чекловлари сабабли турли мамлакатлардаги, тахминан, 6500 та дўконини ёпган. Уларнинг, тахминан, 1500 таси ҳали ҳам ишламаяпти.
Компаниянинг даромади 2020 йилнинг февраль—апрель ойларида 44 фоизга камайиб, 3,3 миллиард еврога тушган. Онлайн савдо эса биринчи чорак давомида 50 фоизга, апрель ойида эса 95 фоизга ўсган.
Эслатиб ўтамиз, Inditex компанияси асосчиси Амансио Ортега коронавирус сабабли март ойида бир ҳафта ичида 12,8 миллиард доллар зарар кўрганди. У 2010 йилдан 2020 йилга қадар 49,9 миллиард долларга бойиган.