Xiaomi компанияси нафақат гаджетлар ишлаб чиқаради, балки унинг «ақлли» уй учун кўплаб техникалари ва ҳатто каравоти ҳам бор. Кўпчиликка Хитой гигантининг металл чамадони ҳам яхши таниш бўлиб, яқинда компания янгиланган Metal Carry-on Luggage 2’ни тақдим этишга тайёрланмоқда, деб хабар беради Gizmochina.
Чамадон корпуси материалининг асосий қисми алюминий-магнийли қоришмадан ташкил топган. У кумушранг тусда бўлиб, ўткир бурчаклари йўқ — барча томони ёйсимон ва яхшилаб сайқалланган.
Чамадони олиб юришда қулайлик яратиш мақсадида унга турли об-ҳаво шароитларига бардошли тўртта ғилдирак ўрнатилган. Шунингдек, ён томонида ҳам ушлагичи бор.
Чамадон ичидаги юкнинг хавфсизлигини нафақат металл корпус, балки TSА қулфи ҳам таъминлайди. У ўз эгасига исталган кодни ўрнатиш имконини беради. Ҳозирда мазкур янгилик ҳақида батафсил маълумотлар йўқ.
Metal Carry-on Luggage 2’нинг тақдимоти 15 июнга режалаштирилган. Чамадон 141 доллардан сотувга чиқиши кутилмоқда.
Изоҳ (0)