Apple ва Microsoft капитализацияси 1,5 триллион доллардан ошган илк компанияларга айланди. Бу NASDAQ биржасидаги навбатдаги савдолар вақтида содир бўлган. Apple акцияси 352 долларга қадар, Microsoft’ники эса 196 долларгача кўтарилган, деб хабар беради Barron’s.
Шунингдек, бошқа технологик гигантлар капитализациясида ҳам ўсиш кузатилган. Amazon’да ушбу кўрсаткич 1,3 триллионга етган бўлса, Alphabet’да эса (Google’га эгалик қилувчи компания) — 1 триллион долларни ташкил этмоқда.
Маълумотларга кўра, ушбу тўртта компания акциялари қийматининг рекорд даражада ўсиши асосий индексларнинг пасайиши фонида содир бўлмоқда. Хусусан, S&P 500 индекси 0,5 фоизга, Dow Jones — 1 фоизга тушиб кетган.
Таъкидланишича, Apple ва Microsoft акциялари қийматининг ўсишига коронавирус инфекциясининг тарқалиши билан боғлиқ инқироз ва АҚШдаги норозилик намойишлари сабаб бўлган. Юқори технологик компанияларнинг қимматли қоғозлари инвесторлар томонидан маблағларни сақлашнинг хавфсиз йўли ҳисобланади.
Компаниялар коронавирус тарқалишидан ҳам фойда кўрган. Amazon оддий дўконлар ёпилиши ва электрон савдоларнинг янада оммалашишидан фойда ола бошлаган, Microsoft технологиялари эса масофадан туриб ишловчилар учун керак бўлди. Alphabet рекламалар ортидан бойиб кетди, Apple компанияси эса 5G iPhone’ларнинг тақдим этилиши ортидан мўмайгина фойда кўрмоқда.
Эслатиб ўтамиз, Apple 2019 йилнинг февралида капитализация бўйича Microsoft’ни ортда қолдирган эди. Ўшанда компаниянинг капитализацияси 806,6 миллиард долларни ташкил этганди. Шу йилнинг январида Alphabet’нинг умумий қиймати 1 триллион долларга етган эди.
Изоҳ (0)