Сардоба тошқинидан сўнг ҳудудда 42 км газ қувурлари монтаж қилинди, электр ва сув таъминотини яхшилаш чоралари кўрилмоқда

Сирдарё вилоятида 1 май куни юз берган сув тошқинидан сўнг учта подстанция, 105 та трансформатор пункти ва салкам 344 километр электр узатиш тармоқлари, 6254 та электр устуни тикланди ва ишга туширилди. Бу ҳақда ФВВ матбуот хизмати раҳбари Мурод Содиқов 12 июнь, жума куни бўлиб ўтган брифингда маълум қилди.

Бундан ташқари, офатдан талафот кўрган ҳудудда қайта тиклаш ва кўмак тадбирлари бошланганидан буён аҳолига қўшимча равишда минг дона маиший газ баллонлари ва 200 дона газ плитаси етказиб берилган. 42 километрга яқин газ қувурлари монтаж қилинган.

14 километрдан ортиқ масофада ичимлик суви тармоқлари ётқизилиб, 9 километрдан зиёд масофада ер қазиш ишлари амалга оширилган. Талафот кўрган 72 километрдан ортиқ масофадаги ичимлик суви тармоқларига қўшимча равишда 34 километр масофада тармоқ қўшилган.

Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори тўғонининг 6-пикет деворида сув чиқиши юзага келганди. Сув тошқини оқибатида 4435 та хонадон талафот кўрган. Улардан 2390 таси яроқсиз ҳолга келган, 2045 таси эса таъмирталаб ҳолатда. Бош прокуратура Сардоба фалокати юзасидан жиноят иши бўйича 4 та тергов версиясини кўриб чиқмоқда. Ҳозирда сув омбори иши бўйича икки киши қамоққа олинган. Сардоба тумани «Дўстлик» маҳалласида 37 та 1480 хонадонли; Мирзаобод тумани «Ҳақиқат» маҳалласида 20 та 800 хонадонли ва «Навбаҳор» маҳалласида 9 та 360 хонадонли кўп қаватли турар жой қурилиш ишлари бошланган.