Президент Шавкат Мирзиёев Инновацион ривожланиш вазирлигига берилган ваколат ва яратилган шароитлардан самарали фойдаланиш, ишланмаларни соҳа ва тармоқларга татбиқ этиш бўйича топшириқлар берди. Бу ҳақда Президент матбуот хизмати хабар бермоқда.
«Мамлакатимиз юқори технологик соҳалар бўйича дунёдан ортда қолиб кетган. Барча соҳаларни модернизация қилиш, жаҳон билан ҳамқадам бўлиш учун Инновацион ривожланиш вазирлигини ташкил этиб, шундай шароитлар яратдик. Бу жамоа йил якуни бўйича бу борада аниқ амалий натижаларни кўрсатиши керак», — дея таъкидлади давлат раҳбари.
Аввалроқ Шавкат Мирзиёев 12 июнь куни Инновацион ривожланиш вазирлигининг янги биносини бориб кўргани ҳақида хабар берилган эди. Президент шу ерда видеоалоқа орқали вазирликнинг Илғор технологиялар маркази мутахассислари билан мулоқот қилган.