Amazon корпорацияси АҚШ полиция департаментига инсонлар юзини танишга қодир Amazon Rekognition технологиясидан фойдаланишни бир йилга тақиқлаб қўйди.
Фото: Geeky.news
Компаниянинг таъкидлашича, болаларни қидириш, одам савдоси қурбонларини қутқариш, йўқолган инсонларни ўз оиласи билан бирлаштириш йўлида шуғулланувчилар технологиядан фойдаланишни давом эттириши мумкин.
Amazon’нинг маълум қилишича, компания аввалроқ юзни танувчи технологияни бошқаришда ҳукумат даражасида анча қаттиқ талаблар белгиланишини сўраган. Компаниянинг ҳисоблашича, бир йиллик мораторий АҚШ конгрессига шу турдаги қоидаларни ўрнатишга етарли бўлади.
Amazon бу каби тақиқни юзни таниш технологияси қора танлиларга нисбатан қўлланилиши мумкинлиги борасида ҳуқуқ ҳимоячиларидан хавфсираб жорий этди.
8 июнь куни IBМ компанияси юзни таниш ва «оммавий кузатиш, ирқий ажратиш ва базавий қоидалар ҳамда инсон эркинлигининг бузилиши»да фойдаланиладиган бошқа технологиялар учун дастурий таъминот ишлаб чиқаришдан бош тортган эди.
Мавзуга доир:
Эслатиб ўтамиз, Миннеаполис шаҳри полицияси вакили 25 май куни 46 ёшли афроамерикалик Жорж Флойдни қўлга олиш чоғида уни тутиб, ерга ётқизган ва тиззаси билан бўйнини босган. Полициячи уни шу тариқа узоқ вақт ушлаб туриши Жорж Флойднинг ўлимига сабаб бўлган. Ҳолат акс этган видео ижтимоий тармоқларда тарқалгач, АҚШнинг турли ҳудудларида норозилик намойишлари бошланган. АҚШнинг 25 та шаҳрида оммавий норозиликлар сабаб комендантлик соати эълон қилинган.
