Ilon Mask Amazon’ni monopolist deb atadi va uni bo‘lib yuborishni taklif qildi

Tesla va SpaceX kompaniyalari asoschisi Ilon Mask Amazon kompaniyasini monopolist deb atadi va kompaniyani bo‘lish kerakligi haqida fikr bildirdi. Bu haqda Meduza xabar berdi.

“Amazon’ni bo‘lish vaqti keldi. Monopoliyalar to‘g‘ri emas”, — deb yozdi Mask Twitter’da. Ilon Mask mazkur tvitini koronavirus haqidagi kitobini Amazon’da savdoga qo‘ya olmagan Alex Berenson ismli foydalanuvchiga javoban yozgan, Amazon mazkur foydalanuvchining kitobini savdoga qo‘yishni rad etgan. Boshqa bir tvitda Ilon Mask “Bu aqlsizlik”, deb yozgan va Amazon asoschisi Jeff Bezosga teg qo‘ygan.

Mavzuga doir: Ilon Mask global internet loyihasi doirasida yana 60 ta sun’iy yo‘ldoshni fazoga uchirdi

Amazon dunyodagi eng qimmat kompaniyalardan biri hisoblanadi, uning kapitalizatsiya qiymati ayni paytda 1,29 trillion dollarni tashkil qiladi. Boyligi 150 milliard dollar miqdorida baholanadigan Jeff Bezosning o‘zi dunyodagi eng boy odamlar ro‘yxatida birinchi o‘rinni egallab turibdi.

Mavzuga doir: Pandemiya fonida dunyodagi yirik IT-kompaniyalarning kapitalizatsiya qiymati rekord darajada ko‘tarildi