«Реал» 2019/2020 йилги мавсумнинг қолган уй учрашувларини «Атлетико» стадиони — «Ванда Метрополитано»да ўтказишдан бош тортади, дея хабар беради ESPN.
Манбага кўра, «Қироллик клуби» стадиони «Сантьяго Бернабеу»да ҳозирда реконструкция ишлари олиб борилмоқда, шу сабабли «Реал» қолган 6 та ўйинни ўз машғулот базаси — «Альфредо ди Стефано»да ўтказишни режалаштирган.
Бироқ Испания чемпионати ўйинларига мухлислар киритилиши мумкинлиги ҳақидаги маълумотлар пайдо бўлгач, «Атлетико» президенти Энрике Кересо «Реал»га «Вандо Метрополитано»да учрашувлар ўтказишни таклиф қилган. Аммо «қаймоқранглилар» раҳбарияти таклиф учун азалий рақибларига миннатдорчилик билдирган ҳолда ундан воз кечмоқчи.
Шу билан бирга, агар ҳукумат мухлислар ташрифига рухсат берган тақдирда ҳам «Реал» «Альфредо ди Стефано»даги ўйинларини томошабинларсиз ўтказиши айтилмоқда.
Эслатиб ўтамиз, Испания чемпионати 11 июнь санасидан қайта давом эттирилади. Танаффусдан кейинги дастлабки ўйинда «Реал» «Эйбар»ни қабул қилса, «Атлетико» меҳмонда «Атлетик» билан куч синашади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)