Ўзбекистоннинг собиқ иқтисодиёт ва саноат вазири Ботир Хўжаев «Росгеология»нинг Ўзбекистондаги янги ташкил этилган филиали «Rosgeo Uzbekistan» компаниясига раҳбар этиб тайинланди. Бу ҳақда «Росгеология» томонидан маълум қилинди.
Маълум қилинишича, «Росгеология» ва Ўзбекистон Геология ва минерал ресурслар давлат қўмитаси томонидан ваколатли этиб белгиланган «Ўзбекгеофизика» акциядорлик жамияти Орол денгизи акваторияси ва унга тутуш ҳудудларда геологик моделни аниқлаштириш, нефть-газ истиқболларини ўрганиш ва углеводород потенциалини баҳолаш учун геологик хизмат кўрсатиш тўғрисида шартнома имзолади.
«Росгеология» бош директори Сергей Горковнинг маълум қилишича, мазкур шартнома компания Ўзбекистонда амалга оширадиган кенг қамровли дастурнинг биринчи босқичи ҳисобланади ва мамлакатнинг ресурс имкониятини сезиларли даражада оширишга қаратилган.
Шартнома 2020 йил 27 февралда «Росгеология» ва Ўзбекистон Геология ва минерал ресурслар давлат қўмитаси ўртасида имзоланган Ўзбекистон Республикаси ҳудудларининг иқтисодий имкониятини ривожлантириш учун ер остидан фойдаланиш соҳасида минерал хом ашё ресурсларидан самарали фойдаланиш бўйича ҳамкорлик тўғрисидаги келишувнинг ижросини таъминлаш учун тузилди.
Вазирлар Маҳкамасининг 2020 йил 23 апрелдаги қарори билан «Росгеология» Орол денгизи ва унга тутуш ҳудудларда углеводород хом ашёси имкониятини геологик ўрганиш дастурининг ижрочиси этиб белгиланган.
Мазкур дастурни ва ҳамкорликнинг бошқа йўналишларини амалга ошириш учун «Росгеология» Ўзбекистонда ўзининг филиали «Rosgeo Uzbekistan» компаниясини ташкил қилди.Эслатиб ўтамиз, Ботир Хўжаев жорий йилнинг февраль ойида иқтисодиёт ва саноат вазири лавозимини тарк этиб, Ўзбекистон бош вазирининг саноатнинг ва кооперация алоқаларини ривожлантириш масалалари бўйича маслаҳатчиси лавозимига тайинланганди. Апрель ойи бошида эса Ботир Хўжаевнинг пенсияга чиқиши муносабати билан мазкур лавозимни тарк этгани маълум қилинганди.
Изоҳ (0)