Toshkentda “Archa-ko‘cha”dagi pichoqbozlik jabrlanuvchilaridan biri vafot etdi

Toshkentdagi Kichik halqa yo‘lining Shayxontohur tumanidan o‘tgan, xalq orasida “Archa-ko‘cha” nomi bilan tanilgan qismida 5-iyun, juma kuni bir guruh yoshlar o‘rtasida janjal va pichoqbozlik bo‘lgani haqida xabar berilgan edi. Hodisa oqibatida ikki yigit kasalxonaga yotqizilgan edi.

“Daryo”ning huquqni muhofaza qiluvchi organlardagi manbasi bergan ma’lumotga ko‘ra, ushbu hodisa jabrlanuvchilaridan biri olgan tan jarohatlari oqibatida vafot etgan. Ijtimoiy tarmoqlarda tarqalgan xabarlarda marhum 15 marta pichoq yegani ta’kidlanmoqda.

Toshkent shahar IIBB hodisa yuzasidan 5-iyun kuni bergan axborotida hodisada ishtirok etgan boshqa yigitlarning shaxsi va janjal ishtirokchilarining umumiy sonini aniqlash ishlari olib borilayotgani, ularni qo‘lga olish choralari ko‘rilishi, ushbu holat shahar IIBB boshlig‘ining shaxsiy nazoratida ekani ta’kidlangan edi.