Тошкентда коронавирусга чалинган 76 ёшли эркак вафот этди, дея 8 июнь куни хабар берди Соғлиқни сақлаш вазирлиги. Бу коронавируснинг Ўзбекистондаги 18-қурбонидир.
Маълум бўлишича, Учтепа туманида яшовчи Х. исмли фуқарода 28 май куни коронавирус инфекцияси тасдиқланган, у Тошкент тиббиёт академияси кўп тармоқли клиникасига ётқизилган эди. 31 май куни беморнинг аҳволи оғирлашиб, реанимация бўлимига ўтказилган.
«Кўрсатилган реанимацион муолажаларга қарамай, сунъий нафас олдириш аппаратида бўлган бемор ўткир нафас ва юрак қон-томир етишмовчилигидан вафот этган», — дейилади Соғлиқни сақлаш вазирлиги ахборотида.
Қайд этишларича, вафот этган бемор узоқ йиллар давомида гепатит, юрак ишемик касаллиги, стенокардия, сурункали юрак етишмовчилиги каби касалликлар билан даволаниб келган.
«Айни пайтда марҳумнинг турмуш ўртоғи, фарзанди ва набираларида ҳам коронавирус инфекцияси тасдиқланган. Уларга шифокорларимиз томонидан даво муолажалари кўрсатилмоқда», — дея қўшимча қилган ССВ.
Бунгача Ўзбекистонда 17 киши коронавирус инфекцияси асоратлари оқибатида вафот этган эди:
- 27 март куни Наманган вилоятида Умрадан қайтган қизидан коронавирус юқтириб олган 72 ёшли онахон миокард инфарктидан (унинг жанозасида қариндошларидан ҳеч ким иштирок этмаган);
- 28 март куни Тошкент шаҳрида ўзини уйда даволашга уринган 39 ёшли (эркак) шифокор коронавирус инфекциясидан;
- 7 апрель куни коронавирусга чалинган 40 ёшли эркак юрак ва ўпка етишмовчилигидан;
- 11 апрель куни эса хориж сафаридан коронавирусга чалиниб қайтган фарғоналик 59 ёшли аёл ўткир респиратор дистресс синдром, ўткир нафас етишмовчилиги ҳамда ўпка-юрак етишмовчилиги оқибатида;
- 14 апрель куни Наманган шаҳрида яшаган 73 ёшли Ш. юрак қон-томир етишмовчилигидан;
- 18 апрель куни Тошкент шаҳрида 77 ёшли аёл коронавирус инфекцияси асоратлари — икки томонлама бронхопневмониянинг оғир кечиши, ўткир нафас етишмовчилиги ва ўпка шишидан;
- 22 апрель куни Наманган шаҳрида яшаган 54 ёшли аёл ўткир нафас ва юрак қон-томир етишмовчилигидан;
- 24 апрель куни Ангренда коронавирус инфекцияси тасдиқланган бемор ўткир нафас, ўпка-юрак ва полиорган етишмовчилигидан;
- 29 апрель куни Тошкентда 61 ёшли Г. исмли бемор ўткир респиратор дистресс синдром, ўткир нафас етишмовчилиги, ўпка-юрак етишмовчилигидан;
- 3 май куни Наманганда М. исмли коронавирус инфекциясини юқтириб олган бемор ўткир нафас ва юрак қон-томир етишмовчилигидан;
- 15 май куни Самарқандда коронавирусга чалинган Ў. исмли иккинчи гуруҳ ногирони ўткир нафас ва юрак қон-томир етишмовчилигидан;
- 17 май куни коронавирусга чалингани Сурхондарёда аниқланган сирдарёлик I. исмли ҳайдовчи юрак қон-томир ва ўткир нафас етишмовчилигидан;
- 18 май куни коронавирусга чалинган самарқандлик бемор юрак қон-томир ва ўткир нафас етишмовчилигидан;
- 26 май куни Самарқанд вилоятининг Пахтачи туманида яшаган ва коронавирусга чалинган 63 ёшли бемор ўткир нафас ва юрак қон-томир етишмовчилигидан;
- 31 май куни Тошкент шаҳрида истиқомат қилган ва коронавирусга чалинган 63 ёшли Х. исмли аёл бош мия қон айланишининг ўткир бузилиши, ўпка-юрак етишмовчилигидан;
- 3 июнь куни Тошкент шаҳрида истиқомат қилган ва коронавирусга чалинган 72 ёшли М. исмли эркак ўпка-юрак етишмовчилиги, бош мия қон айланишининг ўткир бузилишидан;
- 6 июнь куни Тошкент шаҳрида истиқомат қилган ва коронавирусга чалинган 70 ёшли Ш. исмли эркак мия шиши, ўткир нафас ва юрак қон-томир етишмовчилигидан вафот этган.
Изоҳ (0)