Karantin cheklovlari sharoitida O‘zbekistonning bir viloyatida yashovchi fuqaro yo‘llanma asosida shaxsiy avtomobilda boshqa viloyatdagi sanatoriyga borishi mumkin. Bu haqda Sanitariya-epidemiologiya nazorati davlat inspeksiyasi boshlig‘i Nurmat Otabekov 8-iyun, dushanba kuni bo‘lib o‘tgan brifingda ma’lum qildi.
Nurmat Otabekovga Farg‘ona vodiysida yashovchi fuqaro Zomin sanatoriysiga yo‘llanma asosida shaxsiy mashinada borish mumkin yoki yo‘qligi masalasida savol berdi.
Ma’lum qilinishicha, agar yo‘llanmada pasport ma’lumotlari, “Zomin” sanatoriysida davolanish uchun shifokor tomonidan berilgan sanator-kurort kartasi hamda 3 kun oldin koronavirusga topshirilgan test natijalari ko‘rsatmalari bo‘lsa, bemalol u yerga borish mumkin.
Eslatib o‘tamiz, O‘zbekistonda 1-iyundan boshlab “yashil” hududlarda, 5-iyundan esa “sariq” hududlarda mehmonxonalar, sanatoriylar, pansionatlar, bolalar oromgohlari, mehmon uylari, plyajlar, boshqa dam olish maskanlari va joylashtirish vositalari faoliyatiga ruxsat berildi. Shuningdek, fuqarolarni dam olish maskanlariga markazlashgan holda olib borish uchun viloyatlararo avtobus qatnovi ham yo‘lga qo‘yildi. Bundan tashqari, 1-iyundan boshlab mamlakatning “sariq” va “yashil” hududlariga ichki turizmga ruxsat etildi.
Izoh (0)