Shavkat Mirziyoyev 2020-yilni “Ilm-ma’rifat va raqamli iqtisodiyotni rivojlantirish yili” deb e’lon qildi

Prezident Shavkat Mirziyoyev 2020-yilga “Ilm-ma’rifat va raqamli iqtisodiyotni rivojlantirish yili” deb nom berishni taklif qildi. Davlat rahbari bu haqda 24-yanvar kuni Oliy Majlisga Murojaatnomasi vaqtida aytib o‘tdi.

Shavkat Mirziyoyevning ta’kidlashicha, O‘zbekiston raqamli texnologiyalar sohasida juda orqada qolgan.

“Aksariyat vazirlik va idoralar rahbarlari axborot texnologiyalaridan juda yiroqda — buni rost-ro‘y aytish kerak. Lekin bunday rahbarlarga — u hokim bo‘ladimi, vazir bo‘ladimi — ertangi kunda o‘rin yo‘q. Shuni hamma bilishi kerak. Qanchalik qiyin bo‘lmasin, bu ishga bugun kirishmasak, keyin kech bo‘ladi”, — dedi Prezident. Davlat rahbarining alohida ta’kidlashicha, raqamli iqtisodiyotga faol o‘tish kelgusi besh yilda eng ustuvor vazifalardan biri bo‘ladi.

“Raqamli texnologiyalar nafaqat mahsulot va xizmatlar sifatini oshiradi, balki ortiqcha xarajatlarni kamaytiradi. Qolaversa, bu korrupsiyaga qarshi samarali vositadir. Bu barchamiz teran anglab olishimiz darkor. Davlat boshqaruvi va ijtimoiy sohada ham raqamli texnologiyalarni keng joriy etib, natijadorlikni oshirish, bir so‘z bilan aytganda odamlar turmushini yaxshilash mumkin”, — dedi Shavkat Mirziyoyev.

Shu munosabat bilan, Prezident O‘zbekistonda “ilm-fan yanada ravnaq topishi, raqobatbardosh iqtisodiyotni shakllantirish borasida boshlagan ishlarimizni davom ettirish maqsadida” 2020-yilga “Ilm-ma’rifat va raqamli iqtisodiyotni rivojlantirish yili” deb nom berishni taklif qildi. Taklif tadbirga yig‘ilganlar tomonidan gulduros qarsaklar bilan qo‘llab-quvvatlandi. Prezident buning uchun minnatdorlik bildirdi.