Janubiy Afrika Respublikasi (JAR) hukumati xorijlik turistlarning mamlakatga kirishiga 2021-yildan ruxsat berishni rejalashtirmoqda. Bu haqda Travel and Leisure xabar qildi.
Mamlakatda koronavirus sabab belgilangan cheklovlar bosqichma-bosqich ravishda bekor qilinayotganiga qaramay turizm sohasini tiklashga bir necha oy vaqt talab qilinadi. O‘tgan haftadan JARda korxonalar, do‘konlar va maktablar ochila boshlagan. Lekin shunga qaramay jamoat joylarida tibbiy niqob taqib yurishning majburiyligi, shuningdek, ko‘chada faqat 6:00 dan 18:00 gacha yurish tartibi ham amalda saqlanib qolingan.
Sayohatchilar qo‘riqxonalarga tashrif buyurishi mumkin, ammo ichki turizm miqyosida sayohat qilishga ham yil oxirigacha ruxsat berilmaydi.
Taxminlarga ko‘ra, JARda mamlakat fuqarolarining dam olish kurortlarida hordiq chiqarishiga dekabr oyida ruxsat tegishi mumkin. Xalqaro turizm mavsumi esa kelasi yil fevral oyidan ochilishi rejalashtirilmoqda.
“Biz doimiy mijozlarga egamiz va 2021- hamda 2022-yillar uchun turpaketlarni maqbul narxlarda taqdim eta olamiz. Ular yo‘llanmalarni ham xarid qilishidan umidvormiz”, — deydi turkompaniya asoschisi Tanya Kotse.
Jons Hopkins universiteti e’lon qilgan statistik ma’lumotlarga ko‘ra, Janubiy Afrikada 37 ming 500 dan ziyod odam koronavirusga chalingan, 790 nafar bemor COVID-19 asoratlari oqibatida hayotdan ko‘z yumgan.
2020-yil 21-aprelda Afrika qit’asida koronavirusga chalinganlar soni 22,5 ming nafardan ko‘proq ekani, keyinchalik oradan bir oy o‘tib, 21-mayda koronavirus yuqtirib olganlarning umumiy soni 3 baravarga ortib 95 ming kishidan oshgani va 100 mingga yaqinlashgani xabar qilingan.
Izoh (0)