Fransiyada tibbiy niqoblar va sigaret qoldiqlarini ko‘chaga tashlaganlarga jarima miqdori 135 yevrogacha oshiriladi

Fransiya hukumati ko‘chalarda tibbiyot niqoblari, qo‘lqoplar va sigareta qoldiqlarini tashlab ketayotgan fuqarolar uchun belgilangan jarimani 135 yevrogacha oshirishni rejalashtirmoqda. Bu haqda Fransiya ekologiya vaziri qoshidagi davlat kotibi Bryun Puarson ma’lum qilgan, deb yozmoqda The Local France.

Hukumat ushbu jarima ko‘zda tutilgan farmon loyihasini iyun o‘rtalarida taqdim qilmoqchi. Politsiya hisobotini tuzish va uni sudga yo‘naltirish vaqtida jarima 750 yevrogacha oshishi mumkin. Ayni vaqtda ushbu qoidabuzarlik uchun 68 yevro jarima tayinlanmoqda.

Vazirlik ushbu choraning 2018-yilda mamlakatda ijrosi boshlagan iqtisodiyot resurslarini tejashni qayta boshlash bo‘yicha “yo‘l-xaritasi”da qayd etilganini bildirgan.

“Ushbu mavzu koronavirus pandemiyasi sabab yanada dolzarblashdi, chunki ko‘chalarda shaxsiy himoya vositalarini otish, uloqtirib ketish holatlari ko‘paygan”, – deyilgan vazirlik bayonotida.

Ekologlarning so‘zlariga ko‘ra, o‘zini yakkalash tartibi yumshatila boshlagach, Fransiyada ko‘chalar, maydonlar, xiyobonlar va boshqa jamoat joylariga tibbiyot niqoblarini tashlab ketish, qo‘lqoplarni uloqtirish holatlari ko‘p uchramoqda.

“Har bir inson yerga tashlangan har qanday chiqindi ko‘p holatlarda okeanga uchib tushishi mumkinligini tushunishi lozim. Dengizlar va okeanlar toza bo‘lishini istasak, ishni pokiza trotuarlardan boshlashimiz lozim”, — degan Puarson.

Mart oyi o‘rtalarida Fransiyada pandemiya tufayli karantin rejimi e’lon qilingan va u ikki oy davom etgandi. Ushbu oraliqda mamlakat bo‘ylab kiyim-kechak do‘konlari, restoranlar va mehmonxonalar yopilgan. 11-maydan respublika hukumati favqulodda sanitar holat bo‘yicha qonun asosida cheklovlarni bosqichma-bosqich yumshata boshladi va ushbu chora-tadbirlar 10-iyulgacha davom etadi.