Мюнхеннинг «Бавария» клуби ҳужумчиси Томас Мюллер бир мавсумда амалга оширилган самарали тўп узатишлар сони бўйича Бундеслига рекордини такрорлади.
30 ёшли футболчи Германия чемпионатининг 30-туридан ўрин олган «Байер»га қарши баҳсда (4:2) иккита голга ассистентлик қилди ва жорий мавсумдаги голли узатмалари сонини 20 тага етказиб олди. Шу тариқа Мюллер Кевин де Брюйне («Вольфсбург») томонидан 2014/2015 йилги мавсумда ўрнатилган натижани такрорлади.
Шунингдек, Мюллер 2006/07 йилги мавсумдан буён топ-5 лигаларида бир мавсум давомида 20 та ассист амалга ошира олган учинчи футболчига айланди. Томас ва Кевиндан аввал «Барселона» собиқ ярим ҳимоячиси Хави 2008/09 йилги мавсумда ушбу кўрсаткични қайд этганди.
Аввалроқ Мюллер «Бавария» билан шартномасини 2023 йилгача узайтирганди. Ушбу мавсумда унинг ҳисобида 30 та ўйин, 7 та гол ва 20 ассист бор.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)