Саудия Арабистонида коронавирусга чалинганлар сони 100 минг кишига яқинлашиб қолди

Саудия Арабистони Соғлиқни сақлаш вазирлиги ўтган бир сутка давомида коронавирус билан касалланиш ҳолати бўйича рекорд кўрсаткични қайд этди — 3121 киши. Бутун мамлакат бўйлаб COVID-19’га чалинганлар сони 100 мингга яқинлашиб қолди, деб хабар беради «РИА Новости».

Маълумотларга кўра, ўтган бир сутка давомида коронавирус билан касалланган 34 бемор вафот этган. Шундай қилиб, мамлакатда COVID-19 қурбонлари сони 676 кишига етди.

«Шунингдек, яна 3121 кишининг коронавирусга таҳлили ижобий чиқди. Мамлакат бўйлаб вирусга чалинганлар сони 98 869 кишини ташкил этмоқда», — дейилади хабарда.

Мамлакат Соғлиқни сақлаш вазирлигининг кунлик ҳисоботига кўра, подшоҳликда ўтган бир сутка давомида 1175 киши соғайган бўлиб, Саудия Арабистонида коронавирусдан даволанишга муваффақ бўлганлар сони 71 791 кишига етган.

Таъкидлаш керакки, Саудия Арабистони коронавирусга чалингалар бўйича араб давлатлари орасида биринчи, дунёда эса 15-ўринда кетмоқда.

Эслатиб ўтамиз, коронавирус сабаб Саудия Арабистонида 23 мартдан бошлаб шаҳарлар аҳолисининг ҳаракатланишига тақиқ киритилган бўлиб, соат 19:00 дан 06:00 га қадар комендантлик соати жорий этилган. Мазкур чеклов 21 кун давомида амалда бўлиши белгиланган эди. Апрель ойининг охирларида комендантлик соати қисман бекор қилиниши маълум бўлганди.