Бразилия президенти Жаир Болсонару ҳукуматнинг мамлакатда коронавирус эпидемиясига оид расмий маълумотларни қисман яшириш тўғрисидаги қарорини қўллаб-қувватлади, деб хабар беради Reuters.
5 июнь куни Бразилия Соғлиқни сақлаш вазирлиги коронавирус билан касалланганлар тўғрисида маълумот берувчи сайт фаолиятини тўхтатиб қўйганди.
Болсонару ўзининг Twitter’даги саҳифасига вазирлик касаллик ўчоқларини аниқлаш ва эпидемияга қарши курашнинг келгуси стратегиясини белгилаб олиш учун COVID-19 бўйича статистикалар тўпламини оптималлаштираётганини ёзиб қолдирган.
Унинг таъкидлашича, ҳозирги маълумотлар «мамлакатдаги вазиятни акс эттирмайди». Статистикада хатоликка йўл қўймаслик учун, касаллар ҳақида маълумот маҳаллий вақт билан соат 22:00 да эълон қилинади. Бунга қадар соат 17:00 дан 19:00 га қадар жойлаштириларди.
Аввалроқ Бразилия президенти Жаир Болсонару АҚШ каби йўл тутиб, Жаҳон соғлиқни сақлаш ташкилотидан чиқиб кетишини маълум қилганди.
Эслатиб ўтамиз, 19 май куни Бразилия коронавирус билан касалланганлар сони бўйича Британиядан ўзиб кетиб, дунёда 3-ўринга чиқиб олган бўлса, 23 май куни Россиядан ўтиб, 2-ўринга кўтарилганди. Жонс Ҳопкинс университети маълумотларига кўра, мамлакатда коронавирус билан касалланганлар сони 672 846 кишига етган, ҳозирга қадар қарийб 36 минг бемор COVID-19 қурбонига айланган.
Изоҳ (0)