Қашқадарё вилоятининг Қарши туманида фермерларга бўш шартнома бериб, имзолашга мужбур қилаётган ва «фермерлар ихтиёри билан тузилганмиз» дея даъвони илгари сураётган ташкилот шунчаки МЧЖ эканлиги, кооперация бўлолмаслиги таъкидланди. Бу ҳақда кластер ва ҳокимлик ўртасида бўлиб ўтаётган навбатдаги суд мажлисида маълум қилинди, дея хабар берди «Дарё» мухбири.
Суд мажлисида сўз олган МЧЖ таъсисчиси Нурбек Мўминов Бош вазир ўринбосари Ўктам Барноев раҳбарлигидаги мажлис баёнида белгиланганидек кооперация тузишга имконият йўқлиги сабабли, шунчаки МЧЖ ташкил қилинганини, фермерларга МЧЖни кооперация деб уқтиришга уринилганини маълум қилди.
«Бирданига кооперация ташкил қилиш имкони йўқлиги сабаб МЧЖ туздик ва фермерларни бирлаштиришга ҳаракат қилдик. Ҳозирча бизда ҳеч қандай техника йўқ. Шунчаки МЧЖ ташкилотмиз», — деди Нурбек Мўминов.
Нурбек Мўминовнинг айтишича, туман ҳокимлиги томонидан кооперация деб кўрсатилаётган ташкилотда ҳали ишчилар ҳам йўқ. Фермерлар билан шартнома тузишда ҳам Бешкент пахта тозалаш заводи ҳисобчиларидан фойдаланилган.
Судда МЧЖ ва фермерлар ўртасида тузилган шартномаларда ҳам камчиликлар борлиги, шартнома тузилган вақт кўрсатилмаганлигига ойдинлик киритилди.
«Бу шартномаларимиз ҳали давлат рўйхатидан ҳам ўтказилмаган», — деди Нурбек Мўминов.
Таъкидлаш лозим, аввалроқ «Дарё»га шикоят қилган фермерлар уларга бўш шартномалар берилиб, ИИБ ходимлари орқали босим ўтказиш орқали шартнома тузилгани ҳақида гапириб берганди.
Суд ишида иштирок этган Давлат хизматлари маркази туман бўлими вакили ҳам тумандаги фермерларга кооперация деб уқтирилаётган ташкилот кооперация бўлолмаслигини, ташкилот МЧЖ мақомидаги тадбиркорлик субъектилигини маълум қилди.
Суд 8 июнь, душанба куни соат 11:00 да ўз ишини давом эттиради.
Мавзуга доир:
- Қарши тумани ҳокими ўринбосари судда кластер фаолияти тўхтатилишини кластер раҳбарининг селекторда қатнашмаслиги, ҳоким телефонига жавоб бермаслиги билан изоҳлади
- Қарши туман ҳокими ва ўринбосари судда икки хил кўрсатма берди. Қай бирининг гапи ростлиги очиқ қолмоқда
- Қарши туман ҳокими Мақсуда Мустафоева: «Ариповдек қуюшқондан чиқади деб ўйласангиз, менда бундай бўлмайди»
Изоҳ (0)