«Менинг фикрим» жамоавий мурожаатлар порталида ҳокимларни халқ томонидан сайлаш амалиётини жорий этиш ҳақидаги жойлаштирилган петиция 10 мингдан ортиқ овоз тўплади. Энди у парламент томонидан кўриб чиқилиши керак.
Унда ҳар бир туман ёки шаҳардан белгиланган миқдорда номзод танлаб, уларнинг энг маъқулини сайлов ўтказиш йўли билан сайлаш кераклиги, сайланган ҳоким ишини баҳолашни эса яна ўша халқ зиммасида қолдириш мақсадга мувофиқлиги таъкидланганди.
«Ижтимоий тармоқлардан маълумки, ҳозирда кўплаб ҳокимларга нисбатан аҳолининг норозилик кайфияти мавжуд. Шу туфайли ҳудудларда аҳолини бошқарадиган ҳокимларни халқнинг ўзи танлаши ва сайлаш амалиётини жорий этиш зарур. Шундагина ҳокимларимиз халқ дардини эшитади, у билан бирга ишлайди», — деб ёзганди петиция муаллифи.
Хабар ёзилган вақтда петицияга 10 288 киши маъқуллаб овоз берган, 98 киши эса қарши чиққан.
Эслатиб ўтамиз, электрон жамоавий мурожаат жамоатчилик томонидан етарли миқдорда қўллаб-қувватланганда у тегишлилиги бўйича Олий Мажлис палаталари ёки халқ депутатлари маҳаллий Кенгаши томонидан кўриб чиқилади. Мурожаатни кўриб чиқиш ва у бўйича қарор қабул қилиш муддати 60 кундан ошмаслиги лозим.
Изоҳ (0)