Нарпай туман халқ таълими бўлими мудири Мирзоҳид Йўлдошев ўқитувчиларни ҳожатхона таъмирлашга мажбурлагани учун 11 миллион сўм жаримага тортилди. Бу «Дарё» мухбири Фарҳод Норбўтаев хабар берди.
Халқ таълими вазирининг 2019 йил 17 январдаги буйруғига кўра, умумий ўрта таълим мактаби директорларининг лавозим мажбуриятлари тасдиқланган бўлиб, директорнинг лавозим мажбуриятига мактаб ҳожатхонасини таъмирлаш киритилмаган.
Шундай бўлса-да, вилоят бандлик бош бошқармаси давлат меҳнат инспекцияси ходимлари томонидан олиб борилган ўрганиш жараёнида Нарпай тумандаги 32-мактаб директори Жўрақул Холмуродов туман ХТБ мудири томонидан мактаб ҳожатхонасини таъмирлашга мажбурлангани маълум бўлган. Директорнинг айтишича, у ҳожатхонани таъмирлаш учун сантехника жиҳозларини ҳам ўз ҳисобидан сотиб олган.
Мавзуга доир:
Мудир ҳожатхона таъмири якунига етганини билиб, 2020 йил 27 май куни мактабга такроран борган ва директорга босим ўтказган ҳолда ҳожатхонадаги таъмирлаш ишларини «Нарпай стандарт» МЧЖ бажарганлиги тўғрисида маълумот ёздириб олган.
Тумандаги 33-мактаб директори Зуҳра Даминова ҳам ХТБ мудири Мирзоҳид Йўлдошев унга мактаб ҳожатхонасини таъмирлашни буюрганини, агарда бажармаса ишдан бўшатиш билан таҳдид қилганлигини маълум қилган.
Ўрганиш давомида аниқланишича, мудир мазкур талабни бошқа мактаб директорларига ҳам айтган ва ноқонуний талабини бажартирган.
Тумандаги 1, 10, 12, 22-мактаб директорлари Т.Саъдинов, Б.Отақулова, М.Очилова, Э.Болтаевлар ҳам мудирнинг ноқонуний талаби ҳақида айтиб берган.
Самарқанд вилоят бандлик бош бошқармаси давлат меҳнат инспекцияси инспекторининг маълум қилишича, ушбу ҳолат юзасидан тўпланган ҳужжатларга кўра, Нарпай туман ХТБ мудири Мирзоҳид Йўлдошев Маъмурий жавобгарлик тўғрисидаги кодекснинг 51-моддаси 1-қисмида (Меҳнатга маъмурий тарзда мажбурлаш) назарда тутилган ҳуқуқбузарликни содир қилганлиги сабабли, базавий ҳисоблаш миқдорининг 50 баравари, яъни 11 миллион 150 минг сўм миқдорида жаримага тортилган.
Изоҳ (0)