2020 йил 5 июнь соат 22:30 ҳолатига кўра яна 20 нафар бемор коронавирусдан тузалди ва бир кунда касалликдан соғайганлар сони 160 нафарга етди. Шу тариқа бир кунда 140 нафар бемор тузалгач ўрнатилган рекорд натижа янада яхшиланди. Бу ҳақда Соғлиқни сақлаш вазирлиги хабар қилган.
Хабарга кўра Навоий вилоятида 14 нафар, Самарқанд вилоятида 4 нафар ҳамда Андижон вилоятида 2 нафар, жами 20 нафар бемор соғайиб, реабилитацияга кузатилган.
Навоийда тузалганларнинг барчаси ушбу вилоятдан (12 нафари Зарафшон шаҳридан, қолган икки нафари эса Хатирчи ва Нурота туманларидан). Улардан 10 нафари эркак, 4 нафари аёл бўлиб, ёши каттаси 52 да, энг кичиги 2 ёшда. Навоий вилоятида коронавирусдан соғайганларнинг умумий сони 110 нафарни ташкил қилмоқда.
Самарқандда тузалганларнинг ҳаммаси ушбу вилоятда истиқомат қилади (Жомбой, Ургут, Нарпай ва Пастдарғом туманларидан 1 нафардан бемор соғайган). Уларнинг 3 нафари эркак, 1 нафари аёл бўлиб, ёши каттаси 40 да, кичиги эса 24 ёшда. Самарқандда соғайганларнинг умумий сони 318 нафарга етди.
Андижон вилоятида тузалганларнинг 2 нафари ҳам эркак (бири 50, яна бири 32 ёшда) Избоскан ва Балиқчи туманларида яшайди. Вилоятда тузалганларнинг умумий сони 177 нафарга етиб, 1 нафар бемор даволанмоқда ва Андижон коронавирусдан холи ҳудуд бўлишга жуда яқин турибди.
Кун давомида 160 нафар бемор тузалиб, аввалги кунларга нисбатан ўрнатилган рекорд марра янада яхшиланди. Ўзбекистонда COVID-19 коронавирус инфекциясидан соғайганларнинг умумий сони 3247 нафарни ташкил қилмоқда.
Ўзбекистонда 15 мартда эпидемия бошланганидан буён коронавирус инфекциясига чалинган беморларнинг 16 нафари касаллик асоратлари оқибатида вафот этган.
Изоҳ (0)