Миннесота штати прокуратураси қўлга олиниш вақтида вафот этган 46 ёшли афро-америкалик Жорж Флойднинг ўлимига алоқадорликда гумонланаётган уч нафар собиқ полициячига айблов эълон қилди. Бу ҳақда суд материалларига таяниб, The New York Times хабар берди.
37 ёшли Томас Лейн, 26 ёшли Александер Куэнг ва 34 ёшли Ту Тао қасддан содир этилмаган қотилликка ундаш ва унга шерикликда айбланмоқда.
Жорж Флойднинг бўйнини тиззаси билан салкам 9 дақиқа босиб турган собиқ полициячи Дерек Шовинга нисбатан эълон қилинган айбловлар қаттиқлаштирилди. Дастлаб у эҳтиётсизлик туфайли содир этилган қотилликда айблаганга бўлса (25 йилгача озодликдан маҳрум этиш жазоси), ҳозир эса қасддан қотиллик содир этишда айбланмоқда. Ушбу модда билан айбланганлар 40 йилгача озодликдан маҳрум этилиши мумкин. Шовин 29 майдан буён ҳибсда сақланмоқда.
Эслатиб ўтамиз, Миннеаполис шаҳри полицияси вакили 25 май куни 46 ёшли афро-америкалик Жорж Флойдни қўлга олиш чоғида уни тутиб, ерга ётқизган ва тиззаси билан бўйнини босган. Полициячи уни шу тариқа узоқ вақт ушлаб туриши Жорж Флойднинг ўлимига сабаб бўлган. Ҳолат акс этган видео ижтимоий тармоқларда тарқалгач, АҚШнинг турли ҳудудларида норозилик намойишлари бошланган. АҚШнинг 25 та шаҳрида оммавий норозиликлар сабаб комендантлик соати эълон қилинди. Дональд Трамп Оқ уй қаршисида содир бўлган норозилик намойиши вақтида ерости бункерига беркингани маълум бўлди.
Изоҳ (0)