Қозоғистонда коронавирусга чалинганлар сони 12 минг кишидан, Афғонистонда эса 17 минг кишидан ошди

Қозоғистонда ўтган бир сутка ичида яна 271 кишида коронавирус инфекцияси аниқланди, деб хабар беради Tengrinews.

Мамлакат бўйлаб касаллар сонининг ортиши 2,3 фоизни ташкил этмоқда. Коронавирусга чалиниш бўйича янги ҳолатлар қуйидаги ҳудудларда аниқланган:

• Қарағанда вилояти — 68 (7,1 фоиз);
• Нур-Султон — 55 (2,4 фоиз);
• Атирау вилояти — 35 (3,1 фоиз);
• Олмаота шаҳри — 26 (1 фоиз);
• Ғарбий Қозоғистон вилояти — 22 (3 фоиз);
• Олмаота вилояти — 21 (5,5 фоиз);
• Шарқий Қозоғистон вилояти — 11 (7,4 фоиз);
• Жамбил вилояти — 7 (1,8 фоиз);
• Костанай вилояти — 7 (3,8 фоиз);
• Павлодар вилояти — 7 (3,2 фоиз);
• Ақтўбе вилояти — 4 (1,1 фоиз);
• Шимолий Қозоғистон вилояти — 3 (4,9 фоиз);
• Чимкент шаҳри — 3 (0,3 фоиз);
• Ақмўла вилояти — 1 (0,6 фоиз);
• Қизилўрда вилояти — 1 (0,2 фоиз).

Бутун мамлакат бўйлаб коронавирусга чалинганлар сони 12 067 кишига етган. Ҳозирга қадар 6240 киши соғайган, 48 киши вирус қурбонига айланган.

Қирғизистонда 4 июнь ҳолатига кўра, яна 28 кишида коронавирус аниқланди. Бу ҳақда мамлакат Соғлиқни сақлаш вазирлигига таяниб, Kloop хабар берди.

Вирус билан янги касалланиш ҳолатлари қуйидаги ҳудудларни аниқланган:

• Бишкек — 15;
• Норин вилояти — 1;
• Ўш вилояти — 6;
• Чуй вилояти — 1;
• Иссиқкўл вилояти — 1;
• Ўш шаҳри — 4.

Бутун мамлакат бўйлаб коронавирусга чалинганлар сони 1899 кишини ташкил этмоқда. Ўтган бир сутка ичида тиббиёт ходимлари орасида яна 7 кишида COVID-19 аниқланган. Стационарлардан 5 нафар тиббиёт ходимига жавоб берилган.

Қирғизистонда ҳозирга қадар 372 нафар тиббиёт ходими коронавирус юқтириб олган бўлиб, уларнинг 270 нафари соғайган. Бутун мамлакат бўйлаб коронавирусга чалинган 1292 нафари даволанишга муваффақ бўлган, 20 киши COVID-19 қурбонига айланган.

Тожикистонда 3 июнь ҳолатига кўра, коронавирусга чалинганлар сони 91 кишига ортиб, бутун мамлакат бўйлаб касаллар сони 4191 кишига етди. Бу ҳақда «РИА Новости» хабар берди.

Маълумотларга кўра, бутун мамлакат бўйлаб коронавирусга чалинганларнинг 2347 нафари соғайган, бир киши вафот этган — Тожикистонда COVID-19 қурбонлари сони 48 кишига етди. Ҳозирда шифохоналарда 1463 киши даволанмоқда, 321 кишига тиббиёт муассасаларидан жавоб берилган.

Афғонистонда коронавирус билан касалланганлар сони 17 минг кишидан ошиб кетди, салкам 300 бемор COVID-19 қурбонига айланди, деб хабар беради Tolo News.

Мамлакат Соғлиқни сақлаш вазирлигининг маълумотларига кўра, Афғонистонда 3 июнь ҳолати бўйича коронавирусга чалинганлар сони 17 267 кишини ташкил этмоқда, 1522 киши соғайган. Ҳозирга қадар коронавирус билан касалланган 294 бемор вафот этган.

Ўзбекистонда 4 июнь соат 10:00 ҳолатига кўра, коронавирусга чалинганлар сони 3 874 нафарга етди. Мамлакатда ҳозиргача 3014 бемор бутунлай соғайган, 16 нафар бемор эса касаллик асоратлари оқибатида вафот этган.