Швециянинг бош эпидемиологи Андерс Тегнелл биринчи марта омма олдида у томонидан таклиф қилинган коронавирусга қарши кураш стратегияси хато бўлганини ва жуда кўп ўлимга олиб келганини тан олди. Эпидемиолог томонидан таклиф қилинган стратегия ўз-ўзини изоляция қилишдан бош тортишни назарда тутганди. Бу ҳақда Forbes хабар берди.
Тегнеллнинг айтишича, агар Швеция мазкур стратегияни танламаганда, коронавирусга қарши яхшироқ курашган бўларди.
«Агар биз ҳозир эга бўлган билимимиз билан мазкур касалликка дуч келганимизда Швеция танлаган ва қолган бутун дунё танлаган усуллар ўртасидаги мақбулини танлаган бўлардик», — деди Тегнелл.
Мавзуга доир: Пандемияда карантинда ўтирмаган ягона Европа давлати. Швециянинг коронавирусга қарши стратегияси бутун дунёга ёйилмоқда
Швеция Европа Иттифоқида эпидемияни тўхтатиш учун изоляция режимини жорий қилмаган, мактаблар ва жамоат жойларини ёпмаган ягона мамлакат ҳисобланади. Мамлакатнинг миллий стратегияси аҳолида жамоавий иммунитет шаклланмагунча ёки зарур вакцина пайдо бўлмагунча, соғлиқни сақлаш тизимига тушадиган юкнинг ортиб кетишининг олдини олиш мақсадида коронавируснинг бир текисда тарқалишини тахмин қилган. Швеция 50 кишидан ортиқ одам қатнашадиган оммавий тадбирларни бекор қилди, бироқ ресторанлар, дўконлар, спорт клублари ва мактаблар ишлашда давом этди. Тегнелл мазкур стратегиянинг муаллифи бўлган, ҳукумат унга эпидемияга қарши кураш чораларини ишлаб чиқишни топширганди.
Жонс Ҳопкинс университети маълумотларига кўра, пандемия бошидан буён Швецияда 38 589 кишида коронавирус аниқланган, улардан 4468 нафари вафот этган.
Изоҳ (0)