Tojikiston sog‘liqni saqlash vaziri Jaloliddin Abdullozoda “SSSR” gazetasiga bergan intervyusida mamlakatda koronavirus kasalligining eng yuqori cho‘qqisi ortda qolganini ma’lum qildi.

“Eng yuqori cho‘qqi 15-mayda, bir kunda 211 kishida koronavirus aniqlanganidan so‘ng ortda qoldi. 15-maydan keyin kundan kunga yangi kasallar soni kamayib, sog‘ayayotganlar ortmoqda. Ko‘rib turganingizdek, so‘nggi kunlarda virus oqibatida hech kim vafot etmadi”, — deydi vazir.

Abdullozodaning so‘zlariga ko‘ra, ular COVID-19 bilan bog‘liq ayrim o‘lim holatlarini tekshirib ko‘rgan, biroq aslida marhumlarning o‘limiga boshqa narsa sabab bo‘lgani aniqlangan.

“Bu odamlar, masalan, operatsiyadan chiqqan yoki shunt o‘rnatgan, yo bo‘lmasam qandli diabeti borlar. Bu kabi vaziyatda ozgina stress ham ahvolning yomonlashishiga salbiy ta’sir ko‘rsatishi mumkin. Aynan qo‘rquv ko‘pchilikni kasalxonaga olib kelgan…”, — deydi sog‘liqni saqlash vaziri.

Uning ta’kidlashicha, kasallar sonining kamayganini mobil shifoxonalarning bo‘shab qolganidan bilish mumkin.

“Kasallarni qabul qilish uchun zaxira sifatida tayyorlab qo‘yilgan mobil gospitallar hamon bo‘sh yotibdi. Haligacha ularning bizga keragi bo‘lmadi. Shifoxonalarimiz bo‘shayapti, kasallar soni kamaymoqda”, — deydi u. Abdullozodaning qayd etishicha, keyingi haftadan COVID-19 bilan kasallanganlarni faqat 2 ta kasalxona qabul qiladi — qisman “Shifobaxsh” va “Istiqlol” klinikasining ikkita korpusida. Qolgan shifoxonalar bo‘shatiladi.

Shu bilan birga, sog‘liqni saqlash vaziri mamlakatda koronavirusni davolash uchun barcha zaruriy dori vositalari mavjudligini ma’lum qilgan.

“Vazirlik omborlarida barcha kerakli dori va tibbiyot vositalari yetarli darajada saqlanmoqda. Har kuni shahar va tuman bosh shifokorlariga zaruriy dori vositalarini zaxiraga olib ketishini va shifoxonalardagi hamda uyda davolanayotgan bemorlaga bepul tarqatishi bo‘yicha vazifa qo‘yaman. Sog‘liqni saqlash vazirligi va tibbiyot muassasalarining omborlarida hozirda ‘Arbidol’, ‘Ergoferon’, ‘Immunal’, ‘Levoflaksin’, ‘Amiksin’, ‘Azitromitsin’, ‘Gidroksixloroxin’, ‘Delagil’, vitaminlar va boshqa dori vositalari yetarli darajada. Bundan tashqari, 2-3 million niqob ham bor… Qo‘rqmang, vahimaga berilmang, doirlarni sotib olmang, chunki koronavirusga chalinganlar uchun dori vositalari, joy, xizmat ko‘rsatish va ovqatlar 100 foiz bepul”, — deydi vazir.

Eslatib o‘tamiz, Tojikistonda koronavirus dastlab 30-aprel kuni aniqlangandi. Bir oy ichida mazkur mamlakatda koronavirusga chalinganlar soni 3807 kishiga yetdi.