Коронавирус эпидемияси бошланган вақтда Жаҳон соғлиқни сақлаш ташкилоти ходимлари Хитойдан касаллик тўғрисидаги маълумотларни олишда қийинчиликларга дуч келган. Бу ҳақда ташкилотнинг ички ҳужжатлари, электрон хабарлари ва интервьюларига таяниб Associated Press хабар қилди.
Унга кўра, ЖССТнинг Хитойдаги вакили Годен Галеа ички йиғилишлардан бирида коронавирус ҳақидаги маълумотларни Хитой мамлакатнинг CCTV телеканалига чиқишидан 15 дақиқа олдин бераётганини айтиб ўтган. Ташкилот жуда кам маълумотга эгалиги ҳақида эпидемиолог Мария ван Керхов ҳам ЖССТнинг январь ойида бўлиб ўтган йиғилишида таъкидлаган.
Шунингдек, қайд этилишича, ЖССТ ходимлари коронавирус ҳақида кўпроқ маълумотга эга бўлиш учун Хитой ҳукуматини ошкора мақташларига тўғри келган.
Кўп ўтмай, январь ойининг иккинчи ҳафтасида ЖССТнинг фавқулодда вазиятлар бўйича директори Майкл Райан 2002 йилги SARS эпидемияси такрорланишининг олдини олиш учун Хитойга кўпроқ босим ўтказишни таклиф қилган. «Худди шундай сценарий, нима бўлаётгани ҳақида Хитойдан хабарлар олиш учун чексиз уринишлар», дея унинг сўзларини келтирмоқда агентлик.
Бундан ташқари, хабарда айтилишича, ҳукуматнинг бир неча лабораториялари «расшифровка» қилганидан кейин ҳам Хитой ЖССТга коронавирус геноми ҳақидаги маълумотларни беришга шошилмаган.
Айни пайтда касалланганлар сони бўйича АҚШ биринчи ўринда бўлиб, мамлакатда коронавирус 1,8 миллион кишида қайд этилган. АҚШ президенти ташкилот ўзининг асосий вазифасини яхши бажара олмаганликда ЖССТни бир неча бор айблаганди. 15 апрелда Трамп ЖССТни молиялаштиришни тўхтатишини эълон қилганди. 17 май куни ташкилотни молиялаштириш қисман тикланиши мумкинлигини билдирган. 29 майда эса АҚШ Жаҳон соғлиқни сақлаш ташкилоти билан муносабатларни тўхтатди.
Изоҳ (0)