Тошкент шаҳрида ОИТС касаллиги бўлган 17 ёшли мактаб ўқувчиси ўзининг таниши қизи — 16 ёшли мактаб ўқувчиси билан жинсий алоқа қилгани учун унга нисбатан жиноий иш қўзғатилди. Бу ҳақда Тошкент шаҳар ИИББ хабар берди.

Терговолди текширувлар доирасида аниқланишича, 17 ёшли А.К. ОИВ инфекцияси билан касалланганлигидан ва ОИТС диспансерида ҳисобда туришидан хабардор бўла туриб, таниши 16 ёшли Р.Б. билан ҳимояланмаган тарзда жинсий яқинлик қилган ва бу билан қизни ОИВ инфекцияси юқтириш хавфи остига қўйган. Қонуний ҳимоячиси иштирокида ИИББ ходимлари билан бўлиб ўтган суҳбатда йигит ўз айбига тўлиқ иқрорлигини билдирган.

Йигитнинг маълум қилишича, у касаллиги сабабли 2009 йилдан буён (7 ёшидан) ҳисобда туриб, мунтазам равишда кўрикдан ўтган. Йигит Р.Б. билан болаликдан таниш бўлганлиги сабабли у билан анчадан буён яхши муносабатда бўлиб, ўсмирлик давриданоқ учрашиб юрган.

«Йигит ва қиз муносабатларни ‘катталар’ даражасига ўтказишни режалаштирмаган эди, аммо бу ҳолат содир бўлганида уларда контрацептив ҳимоя воситаси бўлмаган. Йигит қизни жинсий алоқа хавфли бўлиши мумкинлигидан огоҳлантирган, аммо ўсмирлик севгиси уларнинг кўзини кўр қилиб қўйган эди. Кейинчалик ёшлар ҳимоя воситаларидан фойдаланиб, биринчи ҳолат ҳеч қандай ёмон оқибатларга олиб келмаслигидан умидвор бўлган», — дейилади ИИББ хабарида.

Маълум қилинишича, бироз вақт ўтгач ўзини ёмон ҳис қила бошлаган қиз шифокорга мурожаат қилган ва 5 ойлик ҳомиласи борлигидан хабардор бўлган. Йигитининг ташхисини билган қиз ҳолатнинг жиддийлигини тушуниб, муаммоси ҳақида тиббиёт мутахассисларига ва яқинларига маълум қилган.

Шу тарзда ўрта мактаб юқори синфлар ўқувчиси А.К. ўз ҳаракатлари билан бошқа шахсни таносил касаллигини юқтириш хавфи остида қолдирган. Мазкур ҳолат асосида ички ишлар идоралари томонидан Ўзбекистон Республикаси Жиноят кодексининг 113-моддаси (Таносил ёки ОИВ касаллиги/ОИТСни тарқатиш) бўйича жиноий иш қўзғатилган. Ҳолат бўйича тўпланган маълумотлар айблов хулосаси билан жиноий ишлар бўйича судга йўналтирилган.