Ҳиндистонда оила бедарак йўқолган отасини 2 йил излади. У TikTok туфайли топилди

Эшитиш ва нутқида нуқсони бўлган ҳиндистонлик Венкатешварлу икки йил олдин йўқолиб қолган эди, деб ёзади BBC.

У ўзи туғилиб ўсган Теланган штатидаги қишлоқдан ишлаш учун чиқиб кетиб, қайтиб келмаган. Унинг хотини ва беш фарзанди уйда қолган.

Кейинроқ маълум бўлишича, Венкатешварлу ўзи кетаётган йўналишда ҳаракатланаётган юк машинасига чиқиб олган. Ҳайдовчи буни сезмаган, эркак эса ухлаб қолган. Оқибатда ҳайдовчи уни йўлнинг ўртасида ташлаб кетган.

Шунда Венкатешварлу уйига етиб олиш учун бошқа транспорт тутишга уринган. Бироқ уни мутлақо бошқа йўналишга олиб кетишган. У Панжоб штати шимолидаги Лудхияна саноат шаҳарчасига бориб қолган. Пулсиз қолган эркак тиланчилик қила бошлаган. Эркакнинг ёмон эшитиши ва гапириши вазиятни оғирлаштирган.

Эркак тасодифан полициячи Ажайб Сингҳ тасвирга олган видеога тушиб қолган. Карантин вақтида полициячи ночорларга овқат тарқатган. Хайрия ишларини у видеога олиб, TikTok’ка жойлаштирган. Шундай видеолардан бирида Венкатешварлу ҳам кўриниб қолган.

Видеони қариянинг ўғли кўриб қолади. Оила зудлик билан Лудхияна полицияси билан боғланиб, эркакни топган ва уйига олиб кетган.