Шаҳзода Гарри ва Меган Маркл уйи устидан тез-тез учаётган дронлар туфайли кунига 8 минг доллар эвазига қўриқчи ёллади

Британиядан Калифорнияга кўчиб келган шаҳзода Гарри ва Меган Маркл тан соқчи ёллашга мажбур бўлди, деб ёзади Daily Mail.

Ушбу хизмат қироллик оиласининг собиқ аъзоларига кунига етти минг фунт стерлинг ёки саккиз минг долларга тушади.

Соқчиларни саралаб олиш билан АҚШнинг собиқ президенти Рональд Рейганнинг хавфсизлик хизмати бошлиғи Гэвин де Беккер шуғулланди.

Гарри ва Меган ҳозирда яшаётган уйлари устидан эксклюзив суратлар олиш истагидаги дронлар учиб ўта бошлаганидан сўнг қўриқчилар штатини кучайтириш ҳақида ўйлай бошлади.

Қайд этилишича, Беккернинг қўриқчиларни тақдим этувчи компанияси хизматларидан Мадонна, Женнифер Лоуренс, Шер, Том Хэнкс, Барбара Стрейзанд каби машҳурлар фойдаланади.

«Гарри ва Меган де Беккернинг фирмасига тўлиқ ишонади. Бу Лос-Анжелесдаги энг нуфузли ва ишончли қўриқлаш хизмати агентлигидир. Бироқ улар бу хизмат учун катта пул тўлашига тўғри келади», — дейди оилага яқин инсонлардан бири.

Хавфсизлик учун пулни ким тўлаши номаълум, бироқ Гарри ва Меганнинг дўстлари улар соқчиларини ўз чўнтагидан ёллаётганини айтган.

Эр-хотин ҳозирда америкалик актёр, режиссёр ва тадбиркор Тайлер Перрининг Лос-Анжелесдаги уйида яшамоқда.