Андижонда мастлик оқибатида содир этилган яна бир жиноят кенг жамоатчилик иштирокида муҳокама қилинди. Бу ҳақда вилоят ИИБ матбуот хизмати хабар берди.
Қайд этилишича, 30 май куни соат 19:30 ларда Андижон шаҳрида яшовчи фуқаро Б.С. таниши М.Б.нинг яшаш уйида у билан бирга спиртли ичимлик истеъмол қилиб, Б.С.га қарашли Олтинкўл туманидаги «Жалабек» МФЙ ҳудудида жойлашган пайвандлаш цехига борган. Бу ерда М.Б. маст ҳолда Б.С.ни уятли сўзлар билан ҳақорат қилганлиги учун ўзаро жанжаллашган.
Оқибатда Б.С. шу ерда бўлган хўжалик болтаси билан М.Б.нинг бош қисмига 2 маротаба уриб, оғир тан жароҳати етказган ва у воқеа жойида вафот этган.
Фото: Андижон вилояти ИИБ матбуот хизмати
Мазкур ҳолат юзасидан Олтинкўл тумани прокуратураси томонидан Б.С.га нисбатан Жиноят кодексининг 97-моддаси (Қасддан одам ўлдириш) 1-қисми билан жиноят иши қўзғатилиб, ҳозирда тергов ҳаракатлари олиб борилмоқда.
Фото: Андижон вилояти ИИБ матбуот хизмати
Жиноятни содир этган Б.С.нинг қилмиши Олтинкўл тумани, «Жалабек» маҳалласида яшовчи кенг жамоатчилик иштирокида танқидий муҳокама қилинди. Унда айнан ичкилик оқибатида содир этилган жиноятларнинг аксариятида айбланувчи воқеа пайтида ўз хатти-ҳаракатини билмаслиги, ушбу жиноят ҳам ўз хатти-ҳаракатларини идора қила олмаслик оқибатида келиб чиққанлиги қайд этилди.
